گەنجێکی کورد داهێنانێک بۆ نابینایان دەکات

ئاڤا نیوز

گەنجێکی کورد لەڕێگەی ژیریی دەستکردەوە داهێنانێکی تایبەت بە کەسانی خاوەن پێداویستیی تایبەت و نابینایان دەکات.

وینە گەورەکە: لە پێشانگەی هایتێکس بۆ ئەمساڵ کە 122 کۆمپانیا بەشدارییان کرد و زیاتر لە 43 هەزار کەس سەردانیان کرد، هەر لەمیانەی پێشانگاکە چەندین داهێنانی تەکنەلۆژی نمیاشکران کە بە دەستی گەنجانی کورد دروستکراون، ئەو داهێنانە لە داهاتوودا دەچنە نێو بازاڕی کاڵا جیهانییەکانەوە، چونکە داهێنانەکان ناوازەن و وڵاتان دەتوانن سوودیان لێ وەربگرن. 

چیرۆکی سەرەکی: گەنجێکی کورد کڵاویکی تایبەت بە خاوەنپێداویستیانی تایبەت و نابینایانە دروست دەکات، کڵاوەکە لەڕیگەی کامێرایەکی تایبەت کە بە ژیریی دەستکرد کار دەکات، دەبێتە ڕێبەری کەسانی خاوەنپێداویستیی تایبەت و نابینایان بۆ چوونە دەرەوە و بازاڕکردنیان، چونکە هەموو شتەکان دەناسێتەوە. بۆ نموونە نابینایەک لە بازاڕ، هەر شتێک بخاتە بەردەم کامێراکە، کڵاوەکە بە ژیریی دەستکرد و بەدەنگ، ناوی شتەکەی پێ دەڵێت و ئاگاداری دەکاتەوە لەو شتەی هەڵیگرتووە. 

لێدوانی فەرمی: ڕەوان ڕەشاد ئاکرەیی، داهێنەر و دامەزرێنەری ستارتئەپی گایدەر مەیت بە ئاڤای وت: کڵاوەکە بە ژیریی دەستکردەوە هەموو شتەکان دەناسێتەوە و لەڕێگەی دەنگەوە کەسانی خاوەنپێداویستیی تایبەت و نابینایان ئاگادار دەکاتەوە، ناوی کڵاوی زیرەکە گایدەر مەیتە و دەبێتە ڕیبەری ئەو کەسانی خاوەنپێداویستیی تایبەت. ئێستا لە قۆناغی تاقیکاریدایە و دوای فیدباکی کەسانی خاوەنپێداویستی تایبەت و نابینایان، دەخرێتە بازاڕەوە.