کەمال محەممەد: عێراق تەنیا 50 ملیۆن لیتر نەوت بۆ هەرێمی کوردستان دەنێرێت

ئاڤا نیوز

وەزیری سامانە سرووشتییەکان لەبارەی دابینکردنی نەوتی سپیی ماڵان دەڵێت: عێراق تەنیا 50 ملیۆن لیتر نەوت دەداتە هەرێمی کوردستان، ئەمەش چارەگی پێداویستی ناوخۆیی دابین ناکات.

وێنە گەورەکە: ساڵانە بەر لە هاتنی وەرزی سەرما، لە هەرێمی کوردستان پرۆسەی دابەشکردنی نەوتی سپیی ماڵان بەسەر هاونیشتمانیان دەستپێدەکات، ئەمساڵ کار لەسەر ئەوە کرا زووتر لە ساڵانی ڕابردوو پرۆسەکە دەستپێبکات.

لێدوانی فەرمی: کەمال محەممەد، وەزیری سامانە سرووشتییەکانی حکومەتی هەرێمی کوردستان بە ئاڤا میدیای ڕاگەیاند، پرۆسەی دابەشکردنی نەوتی سپی لە عێراق هەموو ساڵێک لە مانگی 11 دەستپێدەکات. بەر لەو وادەیە وەزارەتی نەوتی عێراق بڕی 50 ملیۆن لیتر نەوت بۆ هەرێمی کوردستان دەنێرێت، ئەمەش ناگاتە 20% پێداویستیی هەرێمی کوردستان، "چونکە پێداویستی ئێمە 267 ملیۆن لیترە، بۆیە ناچارین ئەو بڕەیە تەنیا بەسەر ناوچە شاخاوییەکان دابەش بکەین".

وەزیری سامانە سرووشتییەکان باس لەوەش دەکات، ئەو نەوتەی وەزارەتی نەوتی عێراق بۆ هەرێمی کوردستان دەینێرێت، "بە هەمان نرخ بەسەر هاونیشتمانیان دابەشی دەکەینەوە، بەڵام ئەوەی کە حکومەتی هەرێمی کوردستان خۆی دابینی دەکات، ئەوە لە بازاڕ دەیکڕین و پێش عێراق بەسەر هاونیشتمانیان دابەشی دەکەین".

ئەوەی پێویستە بیزانیت: ماوەی چوار ساڵە وەزارەتی سامانە سرووشتییەکان بە پاڵپشتی سەرۆکوەزیران مەسرور بارزانی نەوت لە بازاڕ دەکڕێت و هەر بەرمیلێکی 200 لیتری بە 100 هەزار دینار بەسەر هاووڵاتیان دابەشی دەکات.