ترەمپ نامە بۆ خامنەیی دەنێرێت

ئاڤا نیوز

دۆناڵد ترەمپ نامەی بۆ ئێران ناردووە و وتوویەتی یان ڕازی بن بە دانوستان، یان هەنگاوێکی دیکەتان لەگەڵ جێبەجێ دەکەین.

وێنە گەورەکە: چەندین ساڵە هەواڵی دانوستانی نێوان ئەمریکا و ئێران بەردەوام چاوی میدیاکارانی لەسەرە، بەڵام زۆرینەی کات هەوڵەکان بێ ئەنجام دەمێننەوە، لە کۆتا لێدوانی سەرۆککۆماری ئێرانیشدا دانوستان لەگەڵ ئەمریکا ڕەتدەکاتەوە و ڕایگەیاند بە هیچ شێوەیەک دانوستان لەگەڵ ئەمریکا ناکەین، ڕۆژی پێنجشەممەش دۆناڵد ترەمپ ڕایگەیاند بۆ دانوستان نامەیەکم بۆ عەلی خامنەیی ناردووە.

ڕاگەیێنراوی فەرمی: دۆناڵد ترەمپ، سەرۆکی ئەمریکا لە چاوپێکەوتنێکی لەگەل کەناڵی فۆکس بیزنس ڕایگەیاند:

٠ ڕۆژی پێنجشەممە 2025-03-06، نامەیەکم بۆ عەلی خامنەیی ڕێبەری باڵای ئێران ناردووە و تێیدا ئامادەیی خۆم بۆ دانوستان لەگەڵ ئەو وڵاتە ڕاگەیاندووە.

٠ لە نامەکەدا وتوومە داوادەکەم دانوستان بکەین، چونکە ئەمە بۆ ئێران باشترە.

٠ هەست دەکەم ئەوان بەدەم داواکەوە بێن، چونکە ئەوانیش مەبەستیانە دانوستان بکەن.

زانیاری زیاتر: ئەم داوایەی دۆناڵد ترەمپ لە کاتێکدایە کە عەلی خامنەیی، ڕێبەری باڵای ئێران دانوستانی لەگەڵ ئەمریکا ڕەت کردەوە و ڕایگەیاند دانوستان لەگەڵ ئەمریکا کارێکی ژیرانە و زیرەکانە نییە و ئابڕووبەرانەیە.

بۆچی گرنگە: ئەم نامەیە بەشێک دەبێت لەو هەوڵانەی دۆناڵد ترەمپ بۆ دانوستان، ئەگەر جێبەجێ بکرێت دڵەڕاوکێی وڵاتانی زلهێز بەرامبەر بەرنامە ئەتۆمییەکانی ئێران کەم دەبێتەوە.

باکگراوند: خامنەیی لە ماوەی یەکەمی سەرۆکایەتی ترەمپدا دژی دانوستانەکان بوو، لە 13ـی ئابی 2018 لە وتارێکیدا گوتی: "دانوستان لەگەڵ ئەمریکا لەلایەن ئیمامەوە قەدەغە کرابوو واتە" ئیمام خومەینی" و منیش قەدەغەم کرد، تەنانەت ئەگەر کۆماری ئیسلامی ئێران دانوستان لەگەڵ ئەمریکا بکات هەرگیز لەگەڵ ئیدارەی ترەمپ دانوستان ناکات.