ئەردۆ‌غان: ڕێککەوتنی سووریا و کورد خزمەت بە ئاشتی دەکات

ئاڤا نیوز

ڕەجەب تەیب ئەردۆغان، سەرۆککۆماری تورکیا ڕایگەیاند، یەکپارچەیی خاکی سووریا و پاراستنی یەکگرتوویی ئەو وڵاتە بۆ ئەوان زۆر گرنگە. هاوکات ڕێککەوتنی نێوان سووریا و کورد خزمەت بە ئاسایش و ئارامی سووریا دەکات.

وێنە گەورەکە: لەدوای ڕووخانی ڕژێمی بەشار ئەسەد ڕۆژی دووشەممە 10-3-2025 مەزڵووم عەبدی، فەرماندەی گشتیی هێزەکانی سووریای دیموکرات (هەسەدە) و ئەحمەد شەرع، سەرۆککۆماری سووریا بۆ قۆناغی ڕاگوزەر بە ئاشکرا کۆبوونەوە و ڕێککەوتنێکی هەشت خاڵییان واژۆ کرد.

لێدوانی فەرمی: ڕەجەب تەیب ئەردۆغان ڕایگەیاند:

- گرنگییەکی زۆر بە یەکپارچەیی خاکی سووریای دراوسێمان و پاراستنی پێکهاتە یەکگرتووەکەی و بەهێزکردنی یەکێتی وڵاتەکەی دەدەین.

- جێبەجێکردنی تەواوی ئەو ڕێککەوتنەی دوێنێ ئەنجامدرا، خزمەت بە ئاسایش و ئارامی سووریا دەکات، براوەی ڕێککەوتنەکەش هەموو برا سوورییەکانمان دەبن.

- هەر هەوڵێک بۆ ڕزگارکردنی سووریا لە تیرۆر بەهەر هەنگاوێک، بە ئاراستەیەکی دروستی دەزانین.

- دەتوانین پیلانەکان تێک بدەین و بە زیادکردنی برایەتیمان وەک عەرەب و تورک و کورد، گرەنتی داهاتوومان بکەین.

ئەوەی پێویستە بیزانیت: ئیدارەی خۆسەری کورد کە هێزەکانی سووریای دیموکرات (هەسەدە) کۆنترۆڵیان کردووە ناوچەیەکی فراوان لە باکوور و ڕۆژهەڵاتی سووریا دەگرێتەوە، هەروەها دیارترین کێڵگە نەوتی و غازییەکانیش لەخۆدەگرێت، بەجۆرێک زۆرترین بەرهەمی سامانی سرووشتی سووریا لەو ناوچانەدا بەرهەمدەهێنرێن و بە ڕێککەوتنی کورد لەگەڵ حکومەتی ڕاگوزەری ئەو وڵاتە ئابووری سووریا دەبوژێنێتەوە و مافی کوردیش لە حکومەتی سووریا جێگیردەکرێت.