ڕانیە دەبێتە خاوەنی هۆڵی بۆنە گشتییەكان بە دیزاین و سیستمی سەردەمیانە

ئاڤا نیوز

 

ڕانیە بووە خاوەنی هۆڵێک کە بە نوێترین دیزاینی بیناسازی و سیستمی دەنگ و ڕووناکی سەردەمیانە دروستکراوە، تایبەت دەکرێت بە نمایشی شانۆیی، ئۆپەرێت، کۆڕی شیعری و فێستیڤاڵی موزیک و گۆرانی.

 

وێنە گەورەکە: وەک وەفایەک بۆ خەبات و قوربانیدانی شاری ڕانیەی دەروازەی ڕاپەڕین، حکومەتی هەرێمی کوردستان لەدرێژەی جێبەجێکردنی پڕۆژە خزمەتگوزارییەکان بۆ هاووڵاتیانی ناوچە جیاوازەکانی هەرێمی کوردستان، پڕۆژەی هۆڵی ڕۆشنبیریی ڕانیەی بە گوژمەی دوو ملیار و 643 ملیۆن دینار، لەسەر ڕووبەری زیاتر لە 13 هەزار مەتر دووجا، بونیاد نا.

 

لێدوانی فەرمی: هیوا مستەفا، بەڕێوەبەری ڕۆشنبیری و هونەریی ڕاپەڕین ڕایگەیاند، "ئەو هۆڵە جگە لەوەی پڕۆژەیەکی قەشەنگە، خزمەتێکە بۆ ژێرخان و ڕۆشنبیری لە سنوورەکە؛ کە نمایشی شانۆیی، ئۆپەرێت، کۆڕی شیعر، فێستیڤاڵی میوزیک و گۆرانیی تێدا دەکرێت و بە مۆدێرنترین دیزاین و کەلوپەلی سەردەمییانەی دابینکردنی سارد و گەرمی، سیستمی دەنگ و ڕووناکی و خزمەتگوزارییەکانی دیکە بونیاد نراوە.

 

ئەوەی لەبارەیەوە دەگوترێت: هونەرمەندان و ڕۆشنبیرانی ڕانیە خۆشحاڵن بە کردنەوەی ئەم هۆڵە کە ساڵانێکی زۆر لە چاوەڕوانیدا بوون.