چالاکییەکانی ئەمساڵی بونیادنانی سلێمانی جیاواز بوون

ئاڤا نیوز

ئەمساڵ بەبۆنەی ساڵیادی بونیادنانی شاری سلێمانی چەندین چالاکی جیاواز لە چەند شوێنێکی سلێمانی بەڕێوەچوون و بڕیارە ڕۆژانی دواتریش بەردەوام بن.

چیرۆکی سەرەکی: یادی 241 ساڵەی بونیادنانی شاری سلێمانی کرایەوە، ئەمساڵ یادەکە بەراورد بە ساڵانی ڕابردوو گەرم و گوڕتر و جیاوازترە، بە بەشداری چین و توێژە جیاوازەکان، چەندین چالاکی جۆراوجۆری هونەری، ئەدەبی و کولتووری بەڕێوەچوون.

لێدوانی فەرمی: هەڤاڵ ئەبوبەکر، پارێزگاری سلێمانی بە ئاڤای ڕاگەیاند، سلێمانی گەیشتووەتە ئاستێکی شایستە و بووەتە شاری یەکتر قبووڵکردن.

زانیاریی پەیامنێر: چۆمان مەحموود، پەیامنێری ئاڤا لە سلێمانی دەڵێت: ئەمڕۆ لە حەوشەی سەرای سلێمانی، چەند چالاکییەکی هونەری و کولتووری بەڕێوەچوون، تێیدا چەندین کەسایەتی، ئەدیب و نووسەر بەشداربوون و هونەرمەندان بە کارە هونەرییەکان پەیامەکانیان بە ئامادەبووان گەیاند.

زانیاریی زیاتر: هەر بۆم بۆنەیەوە ئەم چالاکییانەش بەڕێوەچوون:

٠ فێستیڤاڵی ڕۆشنبیری لە گەڕەکی سابونکەران تاوەکو کاتژمێر 10ـی شەو بەردەوام بوو.

٠ فێستیڤاڵی یادی سلێمانی،  بە چالاکی هونەری و کولتووری و نمایشی جلوبەرگی کوردی بەڕێوەچوو.

٠ کاتژمێر شەش بە ئامادەبوونی هونەرمەند مەحموود محەممەد و گرووپی ئەستێرەکانی هەڵپەڕكێ، لە ماجیدی مۆڵی سلێمانی بە دەهۆڵ و زوڕنا چالاکی هونەری و کولتووری کرا.

٠ کاتژمێر هەشت، شەوە ئاهەنگی خانمان، بە بەشداری خانمە گۆرانیبێژ نیان عەبدوڵڵا و گرووپی میوزیکی شادی خانمان بەڕێوەچوو.

٠ ناوەندی فێرکاری شێخ تەیب قەیوانی، مەراسیمی فێستیڤاڵی یادی 241 ساڵەی بونیادنانی شاری سلێمانی بەڕێوەبرد.

باکگراوند: سلێمانی لە 14-11-1784 لەلایەن ئیبراهیم پاشای بابانەوە ئاوەدانکراوەتەوە و پایتەختی میرنشینەکەی لە قەڵاچووەلانەوە گواستووەتەوە بۆ سلێمانی و ناوی شارەکەی بەناوی سلێمان پاشای باوکییەوە ناونا. بەدرێژایی 100 ساڵە بزاوتی سیاسی، کۆمەڵایەتی، ڕۆشنبیری و پێگەیاندنی هونەر لەو شارەدا بەردەوامە، هەر لەبەرئەوە لەگەڵ هێنانی ناوی سلێمانی دەگوترێت شاری ڕۆشنبیری و هەڵمەت و قوربانی.