سۆسیال دیموكرات دەیەوێت عەبدوڵڵای حاجی مەحموود لە حكومەتیش دەربكات

ئاڤا نیوز

 

مەكتەبی سیاسیی پارتی سۆسیال دیموكراتی كوردستان، ناوی سێ بەربژێری بۆ ئەنجوومەنی وەزیرانی هەرێمی كوردستان ناردووە بۆ ئەوەی یەكێكیان لە شوێنی عەبدوڵڵای حاجی مەحموود ببنە وەزیری كاروباری شەهیدان و ئەنفالكراوان.

وێنە گەورەكە: دوای ئەوەی لەنێو پارتەكەیاندا شوێنگرەوەیان بۆدانا و پۆستی جێگری سەرۆكیان لێسەندەوە، ئێستا دەیانەوێ ئەو پۆستەی لەنێو حكومەتدا بەهۆی حیزبەكەوە وەریگرتووە لە عەبدوڵای حاجی مەحموود بسەننەوە.

زانیاریی بەدەستهاتوو: مەكتەبی سیاسی پارتی سۆسیال دیموكراتی كوردستان، لەبەرواری 06-03-2024، گشتاندنی  فەرمی ناردووە بۆ ئەنجوومەنی وەزیرانی حكومەتی  هەرێمی كوردستان بەگۆڕینی عەبدوڵڵا حاجی مەحموود، وەزیری كاروباری شەهیدان و ئەنفالكراوان لەحكومەتی هەرێمی كوردستان.

لێدوانی فەرمی: "سیڤی هەرسێ بەربژێرمان لەگەڵ نووسراوەكە هاوپێچ كردووە، بۆ ئەوەی یەكێكیان لە شوێنی عەبدوڵڵای حاجی مەحموود بەوەكالەت ببێت بە وەزیر." د. فەرهاد تۆفیق، گوتەبێژی پارتی سۆسیال دیموكراتی كوردستان وای بە ئاڤا نیوز گوت.

زانیاریی زیاتر: لە گشتاندنەكەدا ناوی سێ كەس هاتووە ئەوانیش (فاتیح ڕەئوف ئەحمەد، سادق محێدین و ئامانج جەمال محەمەد). بەڵام بەگوێرەی زانیاریی ئاراس ڕەفیق، پەیامنێری ئاڤا نیوز لە هەڵەبجە ئامانج جەمال بەهێزترین بەربژێرە بۆ وەرگرتنی ئەو پۆستە.

باكگراوند: ڕۆژی سێشەممە 05-03-2024 ئەنجوومەنی سەركردایەتیی پارتی سۆسیال دیموكرات كوردستان، بە سەرپەرشتیی محەممەد حاجی مەحموود، سكرتێری پارتەكە كۆبووەوە و بڕیاری دوورخستنەوەی عەبدوڵڵای برای دا.