بەشێکی خانەنشینان ئەم مانگە سێ مووچە بەیەکەوە وەردەگرن

ئاڤا نیوز

دوای ئەوەی لە سەرەتای ئەمساڵ خانەنشین بوون، زیاتر لە دوو هەزار خانەنشینی لەگەڵ مووچەی مانگی سێ، مووچەی مانگەکانی یەک و دووش وەردەگرن. دواتریش 12 مووچەکەی ئیکرامیان پێدەدرێت.

چیرۆکی سەرەکی: لە ماوەی ڕابردوو  حکومەتی عێراق داوای لە هەرێمی کوردستان کرد تەمەنی خانەنشینی هاوتا بکەن، بەمەش هەزاران فەرمانبەر لە مانگی یەکی ئەمساڵ بەیەکەوە خانەنشین بوون، بەگشتی فەرمانبەرانی ئاسایی سێ تەمەنی گرتەوە، 60 و 61 و 62 ساڵ.

زانیاریی زیاتر: بەهۆی دواکەوتنی مامەڵەکانیان، خانەنشینان لە مووچەی مانگەکانی یەک و دوو بێ بەش بوون، کە ژمارەیان زیاتر لە 25 هەزار کەسە، بەڵام لە ئێستا مامەڵەکانیان تەواو کراوە و ناویان خراوەتە لیستی مووچەی مانگی سێ و مووچەی مانگەکانی یەک و دووش وەردەگرن.

لێدوانی فەرمی: سەرچاوەیەک لە بەڕێوەبەرایەتی گشتیی خانەنشینی هەرێمی کوردستان بە ئاڤای گوت، "زیاتر لە دوو هەزار خانەنشین دۆسییەکانیان تەواوبووە و خراونەتە لیستی مووچەی مانگی سێ، سێ مووچە واتە یەک و دوو و سێ بەیەکەوە وەردەگرن."

لەبارەی خەرجکردنی 12 مووچەکە، پێشتر مریەم عوسمان، بەڕێوەبەری گشتیی خانەنشینیی بە ئاڤای گوتبوو: ناتوانین هیچ کاتێک دیاری بکەین، ناشزانین بە یەک گوژمە پێیان دەدرێت یان بە چەند گوژمەیەک، چونکە پارەکە زۆرە و عێراقیش کێشەی پارەی کاشی هەیە، ئاگادارین عێراق پارەی هەموو خانەنشینانی خۆی نەداوە، بەڵام نافەوتێت و پێیان دەدرێت.