چوار ڕۆژ خۆپیشاندان لە ئیستەنبووڵ قەدەغەکرا

 

ئاڤا نیوز

بە بڕیاری پارێزگاری ئیستەنبووڵ، لە 19-23ـی ئادار بۆ ماوەی چوار رۆژ هەموو جۆرە خۆپیشاندان و گردبوونەوەیەک قەدەغەکرا. ئەمەش بۆ ڕێگریکردن لە ناڕەزایەتی جەماوەی جەهەپە لە بەرامبەر دەستگیرکردنی ئەکرەم ئیمامئۆغلو، سەرۆکی گەورە شارەوانی ئیستەنبووڵ.

بۆچی گرنگە: بەشێک لە شرۆڤەکارانی تورکیا ئەمە بۆ ڕێگریکردن لە هەڵبژاردنی پێشوەختەی سەرۆکایەتی کۆماری تورکیا دەگەڕێننەوە، کە جەهەپە هەوڵ دەدات بەر لەوادەی خۆی ئەنجامی بدات.

چیرۆکی سەرەکی: بەرەبەیانی ئەمڕۆ دوای پارشێو، ئەکرەم ئیمامئۆغلو، سەرۆکی گەورە شارەوانی ئیستەنبووڵ بە تۆمەتی گەندەڵیکردن و پشتیوانیکردن لە تیرۆر دەستبەسەرکرا، لە هەمان کاتدا 106 کەسی دیکە کە سەرۆک شارەوانیی شیشلی و چەند هونەرمەندێک و ئەندامانی جەهەپە لەگەڵ ئەودا دەستبەسەرکران.

کاردانەوەکان:

ئەکرەم ئیمامئۆغلو: من بەردەوام دەبم لە بەرەنگاربوونەوەی هەموو ئەوانەی بەرامبەرم دەکرێت و بەهێزەوە لەسەر پێیەکانم دەوەستم.

ئۆزگور ئۆزێل، سەرۆکی جەهەپە: "ئێمە ڕووبەرووی لێدانێکی گەورەی دەسەڵات دەبینەوە کە لە دژی سەرۆککۆماری داهاتوومان بەکاردێت، گەل ڕێگە بەمە نادات و ئێمەش خۆمان بەدەستەوە نادەین".

دەم پارتی: ئەوەی بەرامبەر ئیمامئۆغلو دەکرێت، بیڕێزیکردنە بە ئیرادەی خەڵک.

ئەوەی ئێستا ڕوودەدات: ژمارەیەکی زۆر لە ئەندام و لایەنگرانی جەهەپە ڕژاونەتە سەر شەقام، پۆلیسێکی زۆر لەسەر شەقامەکانی ئیستەنبووڵن و شەقامی تەقسیم داخراوە و ڕێگری لەهەموو جۆرە گردبوونەوەیەک دەکرێت.