عەبدوڵڵا كوێخا موبارەک: لایەنێكی دیاریكراو لەپشت كوشتنی كوڕەكەمدان

ئاڤا نیوز 

 

عەبدوڵڵا كوێخا موبارەک، كەسایەتی دیاری چەمچەماڵ، ژمارەیەك بەڵگە و دۆكۆیمێنت دەداتە دادگا بۆ سەلماندنی ڕاستی ڕووداوی كوشتنی كوڕەكەی، دەشڵێت بەهۆی بیروڕای جیاوازەوە، چەندین كێشەی سیاسی، یاسایی و كۆمەڵایەتیم لە سنووری قەڵەمڕەوی یەكێتی بۆ دروست دەكرێت و زیانی زۆرمان پێگەیێندراوە.

 

چیرۆكی سەرەكی: عەبدوڵڵا كوێخا موبارەک، كەسایەتی دیاری دەڤەری چەمچەماڵ، وەك سكاڵاكار ڕووی لە دادگای تاوانەكانی سلێمانی و دادگای بەرایی چەمچەماڵ كرد و چەندین بەڵگەی حاشاهەڵنەگری پێشكەشی دادگا كرد لەبەرامبەر ئەو كێشە كۆمەڵایەتی و سیاسی و یاساییانەی لەوەتەی ساڵی 2021ـەوە بۆ دروست دەكرێت.

 

لێدوانی فەرمی: عەبدوڵڵای كوێخا موبارەك تایبەت بە ئاڤا ڕایگەیاند، لەوەتەی چوومەتە ڕیزەكانی پارتی دیموكراتی كوردستانەوە، لە دوو قۆڵەوە گرفت و كێشەم بۆ دروست دەكرێت.

- لەڕووی یاسایی و ئەمنیەوە تۆمەتی ئەوەم بۆ دروست دەكرێت گوایە بەڕۆژی ڕووناك هەڕەشەمان لە ئەندامانی هێزەكانی ئاسایش كردووە. لەسەر ئاستی ئیرهابی فكریش حیزبێكی دیاریكراو لەسەر ئاستی باڵا بەردەوام هەوڵی ناشیرینكردن و لەكەداركردنی كەسایەتیمان دەدات، ئێمەش بە کردار پاکی و ڕاستگۆیی و خۆنەویستی خۆمان سەلماندووە.

- چەندین بەڵگەمان داوەتە دادگا كە دەیسەلمێنێت شەش كەس دەستیان هەیە لە كوشتنی كوڕەكەم كە سەر بە دەزگایەكی ئەمنی دیاریكراون.

- دەنگۆی ئەوەش هەیە بەشێك لەو تۆمەتبارانە لەلایەن ئەو دەزگا ئەمنییەوە شاردراونەتەوە.

- چاوەڕێین دادگا بە ئەركی یاسایی خۆی هەڵبستێت لەئەگەری پابەندنەبوونی بە یاسا و خۆدزینەوە لە بەڵگەكان، لە دادگای پیاچوونەوە تانە لە بڕیاری دادگا دەگرین.