بەهۆی هێرشێکی ئاسمانی ئەمریکا بۆ سەر یەمەن شەش کەس کوژران

ئاڤا نیوز

تا دێت هێرشە ئاسمانییەکانی ئەمریکا بۆ سەر پێگە و بارەگاکانی حووسییەکان لە یەمەن زیاتر دەبێت و تا ئێستا سەدان هێرشی ئاسمانی کردووەتە سەر ئەو وڵاتە.

چیرۆکی سەرەکی: ماوەی دوو هەفتەیە بە بڕیاری دۆناڵد ترەمپ، ئەمریکا بەردەوامە لە بۆردومانکردنی پێگە و بارەگاکانی حووسییەکان لە یەمەن.

ڕاگەیێنراوی فەرمی: حووسییەکانی یەمەن ڕایانگەیاند: لە دوێنێوە ئەمریکا 15 هێرشی ئاسمانی کردووەتە سەر ڕۆژهەڵاتی سەعدە و ناوچەکانی دیکەی یەمەن و بەهۆیەوە شەش کەس کوژراون و چەندین کەسی دیکەش برینداربوون.

لە لایەکی دیکەوە: تا ئێستا ئەمریکا زانیاری تەواوی لەسەر ژمارەی هێرشەکانی بڵاونەکردووەتەوە، بەڵام  ڕۆژی سێشەممە، وتەبێژی کۆشکی سپی ئاشکرای کرد ئەمریکا 200 هێرشی ئاسمانی کردووەتە سەر حووسییەکان.

باکگراوند: ڕۆژی 2025-03-15، ئەمریکا بە فەرمانی دۆناڵد ترەمپ، سەرۆکی ئەمریکا ئۆپەراسیۆنێکی دژی حووسییەکانی یەمەن دەستپێکردووە و تا ئێستا 67 کەس کوژران و 139 کەسی دیکەش برینداربوون.