دەرباز كۆسرەت: دوای پشووەكانی جەژن گفتوگۆ لەبارەی دیاریكردنی پۆستەكان دەكەین

ئاڤا نیوز

 

دەرباز كۆسرەت ڕەسول ئاشكرای دەكات، پاش پشووەكانی جەژن، كۆبوونەوەكانی تیمە تەكنیكییەكانی پارتی و یەكێتی بۆ پێكهێنانی كابینەی داهاتووی حكومەتی هەرێمی كوردستان دەستپێدەكاتەوە و گفتوگۆ لەبارەی دیاریكردنی پۆستەكان دەکرێت.

 

وێنە گەورەكە: پارتی و یەكێتی وەك هەردوو حیزبی براوەی یەكەم و دووەمی هەڵبژاردنی خولی شەشەمی پەرلەمانی كوردستان، لەماوەی ڕابردوودا چەندین گەڕی گفتوگۆ و دانووستاندنیان ئەنجامداوە بۆ پێكهێنانی كابینەی دەیەمی حكومەتی هەرێمی كوردستان، ئاڕاستەكان بەوجۆرەن لە ئاییندەیەكی نزیكدا بگەنە ڕێككەوتنی كۆتایی.

 

لێدوانی فەرمی: دەرباز كۆسرەت، ئەندامی مەكتەبی سیاسیی یەكێتیی نیشتمانیی كوردستان و ئەندامی شاندی باڵای دانووستاندنکار بۆ پێكهێنانی كابینەی داهاتوو لە كۆنفرانسێكی ڕۆژنامەوانیدا ڕایگەیاند، بەهۆی پشووەكانی جەژن كۆبوونەوەكان ڕاگیراون و دوای جەژن كۆبوونەوەكان دەستپێدەكەنەوە، 

- دواهەمین كۆبوونەوەمان ئامادەكاریی ڕەشنووسی دیدگای هاوبەشی پارتی و یەكێتی بوو بۆ كابینەی داهاتووی حكومەتی هەرێمی كوردستان و لە كۆبوونەوەكانی داهاتوو گفتوگۆ لەبارەی دیاریكردنی پۆستەكانەوە دەكەین.

- ئێمە وەكو یەكێتی هەركەسێك بەشیاو بزانین بۆ وەرگرتنی پۆستە باڵاكان، دواتر دەستنیشانیان دەكەین و پێویستە ئەو كەسە لەئاست چاوەڕوانیی خەڵكی كوردستان بێت.

- كاری هاوبەشی تیمە تەكنیكییەكانی پارتی و یەكێتی لەماوەی ڕابردوودا ڕاستە بەهێواشی ڕۆیشتووە، بەڵام بەرهەمی هەبووە و كاری زۆرباش كراوە بۆ لابردنی بەربەستەكان و لێكنزیككردنەوەی بۆچوونەكان.