گۆڕانی گردی زەرگەتە: سێیەمین كۆنفرانس دەبەستین

ئاڤا نیوز

 

لێپرسراوی ژووری هەڵبژاردنی بزووتنەوەی گۆڕان - باڵی گردی زەرگەتە ڕایدەگەیەنێت، سێیەمین كۆنفرانسی بزووتنەوەی گۆڕان دەبەستن و ئامادەكارییەكان تەواوكراون.

 

وێنە گەورەكە: لە مانگی شوباتی ڕابردوو، فەرمانگەی پارت و ڕێكخراوە سیاسییەكان بە نووسراوی فەرمی داوای لە بزووتنەوەی گۆڕان كرد كۆنفرانسی ڕێكخستنەوەی حیزبی ببەستن، هەردوو باڵی بزووتنەوەكەش 'باڵی گەڕەكی كوردسات و باڵی گردی زەرگەتە' خۆیان بە میراتگری شەرعی بزووتنەوەی گۆڕان دەزانن و كەسیان دان بە كۆنفرانسی ئەوەی تریان نانێت.

 

لێدوانی فەرمی: یاسین حەمەعەلی، لێپرسراوی ژووری هەڵبژاردنی بزووتنەوەی گۆڕانی زەرگەتە لە کۆنفرانسێکی ڕۆژنامەوانیدا ڕایگەیاند: ڕۆژی شەممە 5-4-2025 كاتژمێر 10ـی بەیانی، لە هۆڵی كۆنفرانسەكان لە گردی زەرگەتەی شاری سلێمانی، سێیەمین کۆنفرانس دەبەستین، ئەوەش پاڵپشت بە بڕیارەکانی کۆمیسیۆن و فەرمانگەی پارت و ڕێکخراوە سیاسییەکان، بۆ ئەم مەبەستەس دەستەی بەستنی كۆنفرانس، بانگهێشتی سەرۆک و ئەندامانی ئەنجوومەنی کۆمیسیارانی كۆمسیۆنی باڵای سەربەخۆی هەڵبژاردنەكان و بەڕێوەبەری گشتیی فەرمانگەی پارت و ڕێکخراوە سیاسییەکان دەكات، بۆ سەرپەرشتیکردنی کۆنفرانسەکە.

 

بۆچوونی لایەنی بەرامبەر: گۆڕانی كوردسات پێشتر ڕایگەیاندبوو، ئەو كۆنفرانسەی گردی زەرگەتە، یاسایی نییە و پووچەڵە، بەو پێیەی كۆمیسیۆن ئامادە نییە چاودێریی كۆنفرانسەكە بكات.