ڕێبەر ئەحمەد هۆكار و چارەسەرییەكانی كۆچی نایاسایی لەگەڵ وەزیرانی 40 وڵات تاوتوێ دەكات

ئاڤا نیوز

 

وەزیری ناوخۆی هەرێمی كوردستان، هۆكار و چارەسەرییەكانی كۆچی نایاسایی و بەرەنگاربوونەوەی دیاردەی بەقاچاخبردنی پەنابەران لەگەڵ وەزیرانی 40 وڵات تاوتوێ دەكات.

 

وێنە گەورەكە: لە چوارچێوەی بەشداریکردنی لە لوتکەی ئاسایشی سنوور لە لەندەن لەسەر بانگهێشتی فەرمیی وەزارەتی ناوخۆی بەریتانیا، ڕێبەر ئەحمەد، وەزیری ناوخۆی هەرێمی کوردستان، لە پانێڵی یەکەمی وەزیرانی 40 وڵاتی بەشدار، وتاری هەرێمی کوردستانی پێشکەش کرد.

 

لێدوانی فەرمی: وەزیری ناوخۆی هەرێمی كوردستان ئاماژەی بەوە كرد، هاووڵاتییانی کوردستان تاراوگەیان وەکوو ناچاری هەڵبژاردووە و لە کاتی هەبوونی ئومێد و ئارامیدا، بۆ ئاوەدانکردنەوەی وڵاتی خۆیان گەڕاونەتەوە.

 

هۆكارە زانراوەكان: سەرەڕای ئەوەی دوای ڕووخانی ڕژێمی دیکتاتۆریی عێراق لە 2003، كۆچی پێچەوانەی هاونیشتمانیان بۆ هەرێمی كوردستان دەستی پێكرد، كەچی سەرهەڵدانی داعش و بڕینی بودجەی كوردستان لەلایەن بەغدا و زەوتكردنی مافی كوردستانیان لە ناوچە كوردستانییەكانی دەرەوەی ئیدارەی هەرێمی كوردستان و هاتنی لێشاوی ئاوارە و پەنابەران بۆ هەرێمی كوردستان و بەردەوامی شەڕ و ناكۆكییەكان لە ناوچە سنوورییەكانی هەرێمی كوردستان، وایكرد جارێكی دیكە كۆچی هاونیشتمانیان بۆ تاراوگە دەستپێبكاتەوە.

 

چارەسەرییەكان چین: ڕێبەر ئەحمەد باسی لە هەنگاوەكانی حكومەتی هەرێمی كوردستان كرد بۆ سنوورداركردنی دەرفەتەكانی تاوانی قاچاخچێتی لەلایەن گرووپ و باندە تاوانكارییەكان كە ئەمانەنەن:

یەكەم: دۆزینەوەی چارەسەر بۆ کێشە ئابوورییەکان لەڕێگەی هەمەچەشنکردنی سەرچاوەی داهات.

دووەم: هەماهەنگی لەگەڵ نووسینگەکانی گەشتیاری بۆ ڕێگریكردن لە مامەڵە و چالاکیی نایاسایی گەشتکردن.

سێیەم: کەمپەینی هۆشیارکردنەوە لە مەترسی تۆڕەكانی بازرگانیكردن بەمرۆڤ بەتایبەت لە ڕێی سۆشیاڵ میدیا.

چوارەم: کەمکردنەوەی پشتبەستن بە مامەڵەی کاش لەڕێی پرۆژەی (هەژماری من) و بەدیجیتاڵكردنی مامەڵە داراییەكان.