پارتی مەکتەبی ڕێکخستنەکانی خۆی لە کەرکووک دەکاتەوە

ئاڤا نیوز

پارتی ڕێکخستنەکانی لە کەرکووک بەهێزتر دەکات و ئەمڕۆ بەفەرمی بارەگای مەکتەبی ڕێکخستنی کەرکووک-گەرمیان دەکاتەوە کە لەدوای ڕووداوەکانی شازدەی ئۆکتۆبەرەوە داخرابوو.

 

وێنە گەورەکە: دوای ڕووداوەکانی 16ـی ئۆکتۆبەر، هێزە عێراقییەکان دەستیان بەسەر بارەگاکانی پارتی لە کەرکووکدا گرتبوو. دوای شەش ساڵ و بەدیاریکراوی لە 26-11-2023، پارتی بارەگای لقی سێی خۆی لە شاری کەرکووک بە هەڵدانی هەزاران ئاڵای کوردستان کردەوە، کە لەسەر ئەرکی خۆیشی بارەگاکەی نۆژەنکردەوە، ئەمڕۆ شەممەش بە کردنەوەی بارەگای مەکتەبی ڕێکخستنی کەرکووک-گەرمیانی پارتی دیموکراتی کوردستان، پێگە و هەبوونی سیاسی و جەماوەری خۆی لە پارێزگاکە پتەوتر دەکات.

 

لێدوانی فەرمی: حەسەن مەجید، سەرۆکی فراکسیۆنی پارتی لە ئەنجوومەنی پارێزگای کەرکووک تایبەت بە ئاڤا ڕایگەیاند، پێشنیوەڕۆی ئەمڕۆ بارەگای مەکتەبی ڕێکخستنی کەرکووک-گەرمیانی پارتی لە گەڕەکی عەرەفە دەکرێتەوە و بەشێک لە ئەندامانی مەکتەبی سیاسیی ئەو حیزبە لەمەراسیمی کردنەوەی بەشدار دەبن.

- ئەو بەرپرسەی پارتی ئاماژەی بەوەشکرد، پارتی حیزبێکی مۆڵەتپێدراوە و ئەنجامی هەڵبژاردنیش دەریخستووە کە خاوەنی پێگەیەکی جەماوەریی بەهێزە لەسنوورەکە، بۆیە بە مافی خۆی دەزانێت ڕێکخستنەکانی بەهێزتر بکات.

- هەر لەم هەفتەیە ڕۆژێک دیاریکراوە کە تێیدا بەرپرسانی لایەنە سیاسییەکانی دیکە داوەتکراون بۆ بەشداریکردن لە ڕێوڕەسمی کردنەوەی مەکتەبی ڕێکخستنی کەرکووک-گەرمیانی پارتی.

بۆچی گرنگە: گەڕانەوەی بەهێزی پارتی بۆ پارێزگای کەرکووک و ناوچەکانی دیکەی سنووری ئیدارەی گەرمیان، چەمکەکانی برایەتی و پێکەوەیی نەتەوەیی و سیاسی ناوچەکە پتەوتر دەکات، لەڕووی نەتەوەییەوە کاریگەری بەهێزی دەبێت بەو پێیەی پارتی موڵکی تاکە نەتەوەیەک و پێکهاتەیەک نییە و پاراستن و داکۆکیکردن لە سەرجەم نەتەوە و پێکهاتەکان یەکێکە لەخاڵە سەرەکییەکانی کارنامەی ئەو حیزبە و بەردەوام بەرگری لێ کردووە.