نۆژەنکردنەوەی بازاڕی قەیسەریی هەولێر کۆتایی هات

ئاڤا نیوز

 

دوای ساڵێک لە سووتانی بازاڕەکە، لەم چەند ڕۆژە بەشی دووەمی بازاڕی قەیسەریی هەولێر ڕادەستی خاوەنەکانیان دەکرێت و ئیتر نۆژەنکردنەوەی بازاڕەکە کۆتایی دێت.

 

وێنە گەورەکە: بازاڕی قەیسەریی هەولێر بە کۆنترین بازاڕی شاری هەولێر دادەنرێت، بەهۆی بوونی شوێنەواری مێژوویی نۆژەنکردنەوەی بەشێک لە دووکانەکان لە وادەی خۆی دواکەوت.

 

لێدوانی فەرمی: نەبەز عەبدولحەمید، قایمقامی هەولێر بە ئاڤا میدیای ڕاگەیاند، نۆژەنکردنەوەی بازاڕەکە بەکۆتا هاتووە و بڕیارە لەم مانگە ڕادەستی خاوەنەکانیان بکرێت و لەلایەن کاسبکاران دەکرێتەوە.

 

هۆکارە زانیارییەکان: لەبارەی هۆکاری دواکەوتنی نۆژەنکردنەوەی لەو وادەیەی بۆی دیاریکرا بوو، نەبەز عەبدولحەمید دەڵێت، بەشی یەکەم دەمێکە تەواو بووە و کاسبکاران دووکانەکانیان کردووەتەوە، بەڵام بەشی دووەم کە بەشی شوێنەواری قەیسەرییە، بەهۆی وردەکاری زۆر لە نۆژەنکردنەوەی، کاتی زیاتری پێویست بوو، ئێستا لە جاران جوانتر و باشتر نۆژەنکراوەتەوە.

 

باکگراوند: شەوی 5ـی ئایاری 2024، لەلایەن باندێکەوە بازاڕی قەیسەریی هەولێر سوتێنرا، دواتر باندەکە دەستگیرکران. بەهۆیەوە زیاد لە 200 دووکان و حەوت کۆگا سووتان. پاشان بە فەرمانی سەرۆکوەزیران مەسرور بارزانی بڕی پێنج ملیار و 300 ملیۆن دینار لەسەر بودجەی پارێزگای هەولێر تەرخان کرا بۆ نۆژەنکردنەوەی.