شوێنەوارە دێرینەکانی سنووری پارێزگای سلێمانی تاڵان دەکرێن

ئاڤا نیوز

 

لە ماوەی سێ مانگدا، هەشت شوێنەواری سنووری پارێزگاکانی سلێمانی و هەڵەبجە تاڵانکراون؛ سەرۆکی ڕێکخراوێک دەڵێت، باند پەیدا بوونە و شوێنەوارەکان دەدزن.

 

وێنە گەورەکە: دیاردەی تاڵانکردنی شوێنەوارەکان کە تەمەنی بەشێکیان بۆ دوو هەزار ساڵ دەگەڕێتەوە، ڕووی لەزیادبوون کردووە و لە سێ مانگدا، سێ باند لە هەڵەبجە و دوو باند لە سلێمانی دەستگیرکراون.

 

چی ڕوودەدات؟ بەم دواییانە دوو گۆڕ کە تەمەنیان هەزار و 500 ساڵ بوو، لە سنووری ئاخجەلەر هەڵدراونەتەوە، ئێسک و پروسکەکانیان و ئەو کەلوپەلە شوێنەوارییانەشی لەگەڵیبوون، دەرهێنراون و دزراون.

 

لێدوانی فەرمی: "باندێکی بەتاڵانبردنی شوێنەوارەکان هەوڵدەدەن شوێنەوارەکانی هەرێمی کوردستان تێکبدەن و بیشێوێنن، دواتر دەیبەن و دەیفرۆشن." ئیسماعیل حەمە ڕەحیم، سەرۆکی ڕێکخراوی زینۆ بۆ پاراستن و ناساندنی شوێنەوار بە ئاڤا نیوزی گوت.

 

ئەمەش بزانە: لە ماوەی سێ مانگدا لە سنووری پارێزگای سلێمانی شێواندنی شوێنەوارێک، لە شارەزوور سێ شوێنەوار، لە هەڵەبجە دوو شوێنەوار و لە ئیدارە گەرمیانیش دوو شوێنەوار تۆمارکراون.