پارتی بۆ بەشداریکردن لە هەڵبژاردن ناوی لە کۆمیسیۆن تۆمار کرد

ئاڤا نیوز

ماوەی هەفتەیەکە، پارتی دیموکراتی کوردستان فۆرمی بەشداریکردن لە هەڵبژاردنی لە کۆمسیۆنی هەڵبژاردنەکانی عێراق پڕکردووەتەوە.

 

لێدوانی فەرمی: سائیب هەرنی، ئەندامی دەزگای هەڵبژاردنی پارتی دیموکراتی کوردستان بە ئاڤا نیوزی ڕاگەیاند؛ ئەمڕۆ پارتی بەفەرمی ناوی خۆی لە کۆمیسیۆنی هەڵبژاردنەکان تۆمارکرد و دەست بە ئامادەکاری دەکات بۆ پرۆسەی هەڵبژاردنی خولی شەشەمی پەرلەمانی کوردستان.

 

لەلایەکی دیکەوە: فەرهاد ئەسعەد، بەرپرسی کاروباری پارتەکان لە لقی هەولێری کۆمیسیۆنی باڵای سەربەخۆی هەڵبژاردنەکانی عێراق  بە ئاڤا نیوزی گوت: "لەکۆی 65 بەربژێری سەربەخۆ 22 بەربژێر و لەکۆی 35 حیزب 18 حیزب فۆرمی بەشداریکردنیان پڕکردووەتەوە و بۆ کۆمیسیۆنیان گەڕاندووەتەوە".

 

زانیاریی زیاتر: جگە لە پارتی لایەنە سەرەکییەکانی  هەرێمی کوردستان (یەکێتی، کۆمەڵ، یەکگرتوو، نەوەی نوێ و گۆڕان) فۆڕمەکەیان پرکردووەتەوە و بۆ کۆمیسیۆنیان گەڕاندووەتەوە.