محەممەد حاجی مەحموود و عەبدوڵڵای برای بە جیا بەشداریی هەڵبژاردن دەکەن

ئاڤا نیوز

 

پارتە چەپەکانی کوردستان بوونەتە دوو بەرە و بە دوو هاوپەیمانی بەشداری لە خولی شەشەمی هەڵبژاردنی پەرلەمانی کوردستان دەکەن.

 

وێنە گەورەکە: محەممەد حاجی مەحموود، سەرۆکی پارتی سۆسیال دیموکرات دەبێتە سەرۆکی هاوپەیمانێتییەک و دوو حیزبی دیکەیشی لەگەڵە، عەبدوڵڵای براشی لەگەڵ سێ حیزب یەکیگرتووە بە جیا بەشداری لە هەڵبژاردن دەکات.

 

لێدوانە فەرمییەکان: هیوا سەید سەلیم، ئەندامی مەکتەبی سیاسیی حیزبی زەحمەتکێشان بۆ ئاڤا نیوز: "پارتی سۆسیال دیموکراتی کوردستان، لەگەڵ حیزبی شیوعی و زەحمەتکێشان هاوپەیمانیی کوردستانیان پێکهێناوە محەممەد حاجی مەحموود دەبێتە سەرۆک."

 

د. فەرهاد تۆفیق، گوتەبێژی پارتی سۆسیال دیموکراتی کوردستان بە ئاڤا نیوزی گوت: "ژمارەی بەربژێرەکانمان یەکلانەکردووەتەوە، تەنیا ڕێکارەکانی تۆمارکردنمان لە کۆمیسیۆن تەواو کردووە."

 

زانیاریی زیاتر: عەبدوڵڵای حاجی مەحموود لەگەڵ حیزبەکانی پارتی ڕەنجدەران، یەکێتیی نەتەوەیی و پارتی پارێزگاران هاوپەیمانیی سەردەمیان پێکهێناوە و خۆی دەبێتە سەرۆک.