داوای دامەزراندنی 10 هەزار کارمەندی تەندروستی و هاوتاکردنی دەرماڵەیان دەکرێت

ئاڤا نیوز

 

سەرۆکی سەندیکای کارمەندانی تەندروستی ڕایدەگەیێنێت: یاداشتێکیان داوەتە حکومەتی هەرێمی کوردستان بۆ ئەوەی دەرماڵەی پەرستاران هاوتای حکومەتی عێراق بکرێت، داواشیان کردووە شوێنی بەتاڵی زیاتر لە 10 هەزار کارمەند پڕ بکرێتەوە.

 

وێنە گەورەکە: ڕۆژی 12ـی ئایاری هەموو ساڵێک وەک ڕۆژی جیهانیی پەرستاران دیاری کراوە. دیاریکردنی ئەو ڕۆژە بۆ ڕێککەوتی لەدایکبوونی فلۆرەنس نایتینجڵی ئیتاڵی دەگەڕێتەوە، بە دامەزرێنەری پەرستاری هاوچەرخ دادەنرێت.

 

لێدوانی فەرمی: جەبار محەممەد، سەرۆکی سەندیکای کارمەندانی تەندروستی بە ئاڤا میدیای وت، یاداشتێکمان داوەتە ئەنجوومەنی وەزیران بۆ ئەوەی دەرماڵەی پەرستان لە 50% بکرێتە 100% و هاوتای حکومەتی عێراق بکرێت، یەکێکی دیکە لە داواکارییەکان ئەوەیە، نزیکەی 10 هەزار میلاکی کارمەندی تەندروستیی شوێنیان بەتاڵە و داوامان کردووە ئەوانەی خۆبەخشن دایانبمەزرێنن و ئەو بۆشایەی دروستبووە پڕبکرێتەوە، بەڵام هێشتا وەڵام نەدراوینەتەوە.

 

سەرۆکی سەندیکای کارمەندانی تەندروستی ئەمانەشی وت:

-    10 هەزار و 320 کەس لە نەخۆشخانەکان وەک پەرستار بە خۆبەخش کار دەکەن.

-    %40ـی نەخۆشخانەکان بە خۆبەخش پڕکراوەتەوە کە ئەمەش یاسایی نییە.

-    ئەمساڵ زیاتر لە هەزار و 200 کارمەندی تەندروستی خانەنشین بوون و کەسیش دانەمەزراوە.

-    %60ـی ئەرکەکانی خزمەتگوزاریی تەندروستی لەناو نەخۆشخانەکان لەسەر ئەرکی پەرستاران و کارمەندانی تەندروستییە.

-    ئەوانەی ئێستا پەرستارن بەشێکی بەرچاوییان چوونەتە تەمەنەوە، بەپێی بڕیارێکی وەزارەتی تەندروستی ئەوانەی پەرستارن و لە 20 ساڵ زیاتر خزمەتییان هەیە دەبێت ڕاژەکەیان بگوازرێتەوە بۆ بنکەیەکی تەندروستی.

-    سەندیکای کارمەندانی تەندروستی نزیکەی 50 هەزار ئەندامی لە نۆ لق هەیە

ئەوەی پێویستە بیزانیت: ئاماری وەزارەتی تەندروستی دەریدەخات، ژمارەی پەرستاران لە هەرێمی کوردستان 22 هەزار و 147 کەسە. بەڵام سەندیکای کارمەندانی تەندروستی دەڵێت: بە خۆبەخشەکانەوە نزیکی 32 هەزار پەرستار لە هەرێمی کوردستان هەیە.