ڕێکارەکانی سیستمی نوێی مۆڵەتی شۆفێری دەستی پێکرد

ئاڤا نیوز

هاتوچۆی هەولێر دەڵێت، 150 کەس کە داواکارییان بۆ دەرهێنانی مۆڵەتی شۆفێری پێشکەش کردبوو بە سیستمی نوێ تاقیکردنەوەی میکانیکییان بۆ کرا و لەمەوبەدوا مۆڵەتی شۆفێری بە سیستمی نوێ دەبێت.

وێنە گەورەکە: وەزارەتی ناوخۆی حکومەتی هەرێمی کوردستان ساڵی 2024 ڕێنمایی ژمارەی 11ـی بڵاوکردەوە، بەگوێرەی ڕێنماییە نوێیەکە سیستمی مۆڵەتی شۆفێری بە تەواوی دەگۆڕێت و داواکار بە کۆمەڵێک ڕێکاری نوێ ئینجا دەتوانێت مۆڵەت وەربگرێت.

لێدوانی فەرمی: هێمن حەمەدەمین، وتەبێژی هاتوچۆی هەولێر بە ئاڤا میدیای وت، دوێنی 150 کەس کە داواکارییان پێشکەش کردبوو بۆ مۆڵەتی شۆفێری تاقیکردنەوەی میکانیکییان بۆ کرا، بۆ یەکەمجارە تاقیکردنەوەی میکانیک بە زمانی کوردی بە هەردوو شێوەزاری سۆرانی و بادینی دەبێت، لەگەڵ ئەوەدا زمانی عەرەبی و ئینگلیزی بۆ زیاد کراوە.

- ئەو داواخوازانە لەماوەی ڕابردوودا 21 کاتژمێر وانەی تیۆرییان لە نووسینگەکانی ڕاهێنانی شۆفێری لەلایەن مامۆستایانی ڕاهێنراو خوێندبوو، پرۆگرامی خوێندنەکە  کتێبێکی تایبەت بە هاتووچۆیە و لەلایەن وەزارەتی ناوخۆوە دەرچووە، هاوکات 12 کاتژمێر لێخوڕینی پراکتیکیان کردبوو.

- مۆڵەتی پێشووی شۆفێری (گشتی و تایبەت) بوو، ماوەی دوو ساڵ بوو مۆڵەتی گشتی وەستابوو، بەڵام جۆری مۆڵەتەکان گۆڕانیان لێ بەسەر هاتووە و دوو ڕۆژە مۆڵەتەکان بەردەستن.

ئەوەی پێویستە بیزانیت: جۆری مۆڵەتەکان بەمشێوەیەن:

- جۆری A: ئەم مۆڵەتە تایبەتە بە ماتۆڕسکیل.

- جۆری B: مۆڵەتی تایبەت و گشتی، تاکسی، بارهەڵگر کە کێشەکەی سێ تۆن و نیو بێت.

- جۆری C:  تایبەتە بە بارهەڵگر.

- جۆری C1: بارهەڵگری حەوت تۆن و نیو.

- جۆری D: پاسی گەورە.

- جۆری D1: پاسی 16 نەفەری.

- جۆری T: ئامێرەکانی بیناسازی.