ناکۆکی لەسەر بەڕێوەبردنی لیبیا دەبێتە هۆی کوژرانی بەرپرسێکی ئەو وڵاتە

ئاڤا نیوز

 

شەوی ڕابردوو لە پایتەختی لیبیا شەڕ و پێکدادان لەنێوان هێزەکانی حکومەت و هێزێکی سەر بە سەرۆکایەتیی وڵاتەکە ڕوویدا، بەیانی ئەمڕۆش کۆتاییهاتنی گرژییەکان ڕاگەیێنرا.

 

وێنە گەورەکە: لە ساڵی 2022ەوە لە لیبیادا دوو حکومەت هەیە کە یەکێکیان حکومڕانی ڕۆژئاوای وڵاتەکە دەکات و لە ئاستی نێودەوڵەتیی دانی پێدا نراوە، حکومەتێکی دیکەش هەیە کە پەرلەمانی لیبیا متمانەی پێداوە و حکومڕانی باشوور و ڕۆژهەڵاتی وڵاتەکە دەکات.

 

ڕاگەیێنراوی فەرمی: وەزارەتی بەرگریی و ناوخۆی لیبیا ڕایانگەیاند، دوای گرژییەکانی شەوی ڕابردوو، ئەمڕۆ سێشەممە ئاسایش و ئارامی بۆ تەڕابلووسی پایتەخت گەڕایەوە.

 

- گرژییەکانی دوێنێ لەنێوان "دەزگای پشتیوانی و ئارامی" سەر بە سەرۆکایەتی لیبیا و هێزەکانی سەر بە حکومەتی ڕۆژئاوای وڵاتەکە لەسەر بەڕێوەبردنی هەندێک دامەزراوەی دەوڵەت بوو، لە ئەنجامیشدا عەبدولغەنی کەکلی، سەرۆکی دەزگای پشتیوانی و ئارامی کوژراوە.