ئێران دوو کەسی بەتۆمەتی هاوکاری داعش لەسێدارە دا

ئاڤا نیوز

دەزگای قەزایی ئێران سزای لەسێدارەدانی بەسەر دوو کەسدا جێبەجێ کرد، کە تۆمەتبار بوون بە تەقاندنەوەی پاسێکی زیارەتکاران لە ساڵی 2023ـدا.

ڕاگەیێنراوی فەرمی: دەزگای قەزایی ئێران لە ڕاپۆرتێکی فەرمیی ڕایگەیاند: سزاکە دوای تەواوبوونی هەموو ڕێکارە یاساییەکان و سەلماندنی دەستوەردانی ڕاستەوخۆی ئەو دوو کەسە لە تەقینەوەکە و وەرگرتنی ڕێنمایی لە داعش، جێبەجێ کراوە.

هەر لە ڕاگەیێنراوەکەدا هاتووە، هەریەکە لە (ئامانج کاروانچی) و (ئەرسەلان شێخی) تۆمەتبار بوون بە چاندنی بۆمب لەناو پاسێکی زیارەتکارانی کەربەلا لەسەر ڕێگای تاران-ئیلام و نزیک شاری هەمەدان. لە ئەنجامی ئەو هێرشە تێرۆریستییەی کە لە ساڵی 2023 ڕوویدا، پاسەکە بە تەواویی گڕی گرتبوو و منداڵێکی ساوا کە تەمەنی تەنها ساڵ و نیوێک بوو گیانی لەدەستدابوو، هاوکات ژمارەیەکی زۆری سەرنشینەکانی دیکەش بە سەختیی بریندار ببوون.

زانیاریی زیاتر: بەپێی بەڵگەنامە قەزاییەکان، ئەم دوو کەسە پەیوەندیی ڕاستەوخۆیان لەگەڵ گرووپی داعش هەبووە و ڕێنماییان بۆ ئەنجامدانی کردەوەکە و دروستکردنی شڵەژانی ئەمنیی لەو ناوچەیە وەرگرتبوو، هەر بۆیە دادگا بە "محارب" و تێکدەری ئاسایشی گشتیی ناساندنی و بڕیاری کۆتایی لەسێدارەدانی بۆ دەرکردن.