خوێندنی باڵا: بڕیارەکەی ئەنجوومەنی وەزیران بڕینی دەرماڵەی خزمەتی زانکۆیی ناگرێتەوە

ئاڤا نیوز

دەستەی ڕاوێژکاری لە وەزارەتی خوێندنی باڵا و توێژینەوەی زانستی عێراق، سەرجەم مامۆستایان و فەرمانبەرانی دامەزراوەکانی دڵنیا دەکاتەوە، بڕیاری ئەنجوومەنی وەزیران بە هیچ شێوەیەک کاریگەری لەسەر دەرماڵەی خزمەتی زانکۆ ( الخدمة الجامعية) نابێت.

چیرۆکی سەرەکی: بڕیارێکی ئەنجوومەنی وەزیرانی عێراق کە تێیدا ئاماژە بە ڕێکخستنەوەی هەندێک لایەنی دارایی دەکات، دەبێتە کەمکردنەوەی مووچەی چەندین چینی فەرمانبەر، ناڕەزایی لێکەوتەوە، بەڵام وەزارەتی خوێندنی باڵا جەخت دەکاتەوە کە ماددەی 14 لە یاسای خزمەتی زانکۆ و مافە داراییەکانی تێیدا وەک خۆیان دەمێننەوە.

ڕاگەیێنراوی فەرمی: لە ڕاگەیێنراوێکدا وەزارەتی خوێندنی باڵای عێراق ڕایگەیاند: "بڕیاری ئەنجوومەنی وەزیران کاریگەری نابێت لەسەر ئەو دەرماڵانەی بەپێی یاسا بە فەرمانبەرانی زانکۆ و کارمەندانی تەکنیکی و کارگێڕی دراون، چونکە ناوەڕۆکی بڕگەی 7 لە بڕیاری ژمارە 40ـی ساڵی 2026ـی ئەنجوومەنی وەزیران، بە تەواوی لەگەڵ دەقە یاساییەکانی ناو یاسای خزمەتی زانکۆیدا دەگونجێت."

وەزارەتەکە جەختیشی کردەوە: پابەندە بە پاراستنی شایستە داراییەکانی سەرجەم فەرمانبەرانی چ لە ناو وەزارەت و چ لە زانکۆکاندا، لە چوارچێوەی ڕێکارە یاساییەکاندا.

ئەوەی پێویستە بیزانیت: مادەی 14 بریتییە لە دوو خاڵ

یەکەم: بەخشینی دەرماڵە بە ڕێژەی 100% بە فەرمانبەرانی تەکنیکی کە لە وەزارەت و دامودەزگاکانی سەر بە وەزارەت کار دەکەن.

دووەم: بەخشینی دەرماڵەی خزمەتی زانکۆ بە ڕێژەی 75% لە مووچەی بنەڕەتی بەو فەرمانبەرە کارگێڕییانەی کە کارەکانیان پێویستی بە ئامادەبوونیان هەیە لەگەڵ فەرمانبەرانی خزمەتی زانکۆدا.