هەسەدە: دیمەشق ئاگربەستی پێشێلکرد و بە درۆن هێرشی کردە سەرمان

ئاڤا نیوز

 

هێزەکانی سووریای دیموکرات (هەسەدە) ڕایگەیاند، ئێوارەی ئەمڕۆ جارێکی دیکە گرووپە چەکدارەکانی سەر بە دیمەشق ئاگربەستیان پێشێلکرد و بە درۆنی خۆکوژ هێزەکانیانی لە شارۆچکەیەکی دەوروبەری قامیشلۆ کردە ئامانج، بەهۆیەوە دوو ئەندامی هەسەدە بە سەختی برینداربوون.

ڕاگەیێنراوی فەرمی: هێزەکانی سووریای دیموکرات (هەسەدە) ڕاگەیێنراوێکی بڵاوکردەوە و ڕایگەیاند: "جارێکی دیکە ئاگربەست پێشێلکرا و بەهۆیەوە دوو ئەندامی هێزەکانمان بە سەختی برینداربوون، ئەوەش دوای ئەوەی گرووپەکانی سەر بە دیمەشق بە درۆنی خۆکوژ هێرشیانکردە سەرمان  لە شارۆچکەی جل ئاغا (50 کیلۆمەتر لە شاری قامیشلۆ دوورە و سەر بە پارێزگای حەسەکەیە)."

هەسەدە دەڵێت: "درۆنێکی دیکەش ئاراستەی هێزەکانمان لە هەمان شوێن کراوە و توانیوومانە تێکی بشکێنین."

لەلایەکی دیکەوە: هەسەدە، دواتر ڕاگەیێنراوێکی دیکەی بڵاوکردەوە و  ئاماژەی بەوەکرد، سەرەڕای ئاگربەست، بەڵام دیمەشق بە بەرنامە ئامادەکاری سەربازیی و گرژییەکانی لە حەسەکە و کۆبانێ زیاد کردووە، کە مانای وایە دەیەوێت شەڕێکی نوێ دەستپێبکات، بۆیەش هێزەکانیان لە چەند کاتژمێری ڕابردوو ڕووبەڕووی دوو هێرش بوونەتەوە.

 

٠ ئەم ڕەفتارانەی دیمەشق بە ڕوونی نیشانی دەدات کە چارەسەری سیاسی ناوێت و بەرەو شەڕ هەنگاو دەنێت.

٠ داوا لە کۆمەڵگەی نێودەوڵەتیی و لایەنە پەیوەندیدارەکان دەکەین، بەپەلە کاربکەن بۆ گەرەنتیکردنی پابەندبوون بە ڕێککەوتنی ئاگربەست و ڕێگە بە دروستکردنی هیچ گرژییەک نەدەن کە ئاسایشی ناوچەکە بخاتە مەترسییەوە.