دۆناڵد ترەمپ و ئەحمەد شەرع کۆبوونەوە

ئاڤا نیوز

لە چوارچێوەی سەردانەکەی بۆ سعوودیە، دۆناڵد ترەمپ، سەرۆکی ئەمریکا لەگەڵ ئەحمەد شەرع، سەرۆکی سووریا و محەممەد بن سەلمان شازادەی جێنشینی سعوودیە کۆبووەوە. لە کۆبوونەوەکەدا ترەمپ هانی شەرعی دا بە واژۆکردنی ڕێککەوتنی ئیبراهیمی لەگەڵ ئیسرائیل.

وێنە گەورەکە: ئەمڕۆ دۆناڵد ترەمپ لەسەر بانگهێشتی محەمەد بن سەلمان، شازادەی جێنشینی سعوودیە لەگەڵ ئەحمەد شەرع، سەرۆکی سووریا کۆبووەو. هاوکات ڕەجەب تەیب ئەردۆغان، سەرۆککۆماری تورکیا لە ڕێگەی تەلەفۆنەوە بەشداری لە کۆبوونەوەکەدا کرد.

لێدوانە فەرمییەکان:

- کارۆلین لیڤیت، وتەبێژی کۆشکی سپی ڕایگەیاند، لە کۆبوونەوەکەدا ئەردۆغان ستایشی ترەمپی کردووە بۆ هەڵگرتنی سزاکانی سەر سووریا و پابەندبوو بە کارکردن هاوشانی سعوودیە بۆ هاندانی ئاشتی و خۆشگوزەرانی لە سووریا. 

- شازادەی جێنشینی سعوودیەش دەستخۆشی لە سەرۆک ترەمپ کرد بۆ بڕیارەکەی بۆ هەڵگرتنی سزاکان و بڕیارەکەی بە بوێرانە ناو برد. 

- ترەمپ سوپاسی ئەردۆغان و شازادەی جێنشینی سعوودیەی کرد بۆ پەیوەندییە دۆستانەییەکەیان، هەروەها بە ئەحمەد شەرعی ڕاگەیاند کە دەرفەتێکی گەورەی لەبەردەمدایە بۆ ئەوەی کارێکی مێژوویی لە وڵاتەکەیدا ئەنجام بدات، هانی شەرعیشی دا کارێکی گەورە بۆ گەلی سوریا بکات، هەروەها داوای لێکرد کە ڕێککەوتنی ئیبراهیمی لەگەڵ ئیسرائیل واژۆ بکات، تیرۆریستە بیانییەکان سووریا بە جێبهێڵن، چەکدارانی فەڵەستینی لە سووریا نەمێنن، یارمەتی ئەمەریکا بدەن بۆ ڕێگریکردن لە سەرهەڵدانەوەی داعش،  وەرگرتنی بەرپرسیارێتی ناوەندەکانی دەستبەسەرکردنی داعش لە باکوری ڕۆژهەڵاتی سووریا.

لەلایەکی دیکەوە: ئەحمەد شەرع سوپاسی ترەمپ و شازادەی جێنشینی سعوودیە و ئەردۆغانی کرد بۆ هەوڵەکانیان بۆ پێکەوە دانانی کۆبوونەوەکە، هەروەها دانی بەو دەرفەتە بەرچاوەدا نا کە ئێرانییەکان سووریا بەجێدەهێڵن، هەروەها بەرژەوەندییە هاوبەشەکانی ئەمریکا و سووریا لە بەرەنگاربوونەوەی تیرۆر و نەهێشتنی چەکی کیمیاییدا.

- لە کۆتاییدا شەرع هیوای خواست کە سووریا وەک پەیوەندییەکی گرنگ بێت لە ئاسانکاریی بازرگانی نێوان ڕۆژهەڵات و ڕۆژئاوا، هاوکات بانگهێشتی کۆمپانیا ئەمریکیەکانی کرد بۆ سەرمایەگوزاری لە کەرتی نەوت و غازی سووریا.