پووتین وەڵامی هەڕەشەکانی ئەوروپا بۆ سزادانی ڕووسیا دەداتەوە

ئاڤا نیوز

ڤلادیمێر پووتین لە وەڵامی هەڕەشەکانی وڵاتانی ئەوروپا بۆ سەپاندنی سزا بە سەر ڕووسیادا ڕایدەگەیەنێت کاری کۆمپانیا ئەوروپیەکان سنوردار دەکرێت.

وێنە گەورەکە: لە پێناو ناچارکردنی ڕووسیا بۆ ڕازیبوون بە ئاگربەستی 30  ڕۆژە، هەریەک لە بەریتانیا، فەرەنسا، پۆڵەندا و ئەڵمانیا لە کۆبوونەوەی ڕۆژی شەممەی ڕابردوو لە کیێڤی پایتەختی ئۆکراینا بە نوێنەرایەتی ئەوروپا بڕیاری سزادانی ڕووسیایان ڕاگەیاند لە ئەگەری ڕازینەبوونی ڕووسیا بە ڕاگەیاندنی ئاگربەستی کاتی بێ مەرج.

لێدوانی فەرمی: ڤلادیمێر پووتین، سەرۆکی ڕووسیا لە وەڵامی سەرۆکەکانی ئەوروپا لە کاتی کۆبوونەوەی لەگەڵ ژمارەیەک سەرمایەدار و خاوەن کاری ڕووسیا ڕایگەیاند، هیچ نیگەرانی هەڕەشەکانی ئەوروپا نییە، "سزاکان بەهیچ شێوەیەک نامانترسێنێت، ترس لە فەرهەنگی ئێمەدا بوونی نیە، ئەوەی بترسێت هەموو شتێک لەدەست دەدات و دۆڕاوی هەمیشەیی دەبێت."

زانیاریی زیاتر: ڤلادیمێر پووتین فەرمانی بە حکومەت کردووە بە دۆزینەوەی ڕێکاری گونجاو بۆ سڕکردنی کار و چالاکی ئەو کۆمپانیا بیانیانەی دژ بە سیاسەتی گەشەپێدانی ئابووری ڕووسیا مامەڵە دەکەن و کاری کۆمپانیاکانی ئەو وڵاتانە لە ڕووسیا سنوردار دەکرێت. 

ئەوەی پێویستە بیزانیت: سەرەڕای هەڕەشەکانی ئەوروپا و رووسیا دژ بەیەک، بڕیاروایە سبەینێ کۆبوونەوەی نێوان ڕووسیا و ئۆکراینا لە تورکیا بەڕێوەبچێت.