لە هەولێر سێ كەس لە نێو تانكییەكی بەنزین خنكان

ئاڤا نیوز

 

لە کۆگایەکی بەنزین لە سنووری هەولێر، سێ کەس کە دووانیان کارمەندی بەرگریی شارستانین لەنێو تانکییەکی هەڵگرتنی بەنزین خنکان.

زانیاریی پەیامنێر: شەوکەت قادر، پەیامنێری ئاڤا میدیا لە هەولێر ڕایگەیاند: بەرەبەیانی ئەمڕۆ لە پاڵاوگەیەکی بەنزین لە ناحیەی شەمامک لە سنووری هەولێر، سێ کەس کە دووانیان کارمەندی بەرگریی شارستانیی هەولێرن لەنێو تانکییەکی کۆگاکردنی بەنزین بەدوای یەکەوە خنکاون و تاوەکو ئێستا تەرمی دووانیان دەرهێنراوە و تیمەکانی بەرگریی شارستانی سەرقاڵی دەرهێنانی تەرمی سێیەمن.

 

زانیاریی زیاتر: بەپێی زانیارییەکانی ئاڤا میدیا، سەرەتا کارمەندێکی کۆگاکە لەنێو تانکییەکە خنکاوە و دواتر دوو کارمەندەکەی بەرگریی شارستانی بۆ دەرهێنانی تەرمی ئەو کەسە چوونەتە نێو تانکییەکەوە بەڵام نەیانتوانیوە دەرباز بن و ئەوانیش خنکاون.