زیاتر لە ملیۆنێک قوتابی لە هەرێمی کوردستان بەشداری تاقیکردنەوەی پۆلە ناکۆتاکان دەکەن

ئاڤا نیوز

 

ئەمڕۆ شەممە تاقیکردنەوەی پۆلە ناکۆتاکان لە سەرجەم پارێزگاکانی هەرێمی کوردستان دەستیپێکرد و زیاتر لە یەک ملیۆن قوتابی بەشدار تاقیکردنەوەکان دەکەن.

 

وێنە گەورەکە: پۆلە ناکۆتاکان لە پۆلی یەکەمی سەرەتایی دەگرێتەوە تا 11ـی ئامادەیی، بەڵام ئەم تاقیکردنەوەیە بازنەی یەکەمی خوێندنی بنەڕەتی ناگرێتەوە کە هەریەکە لە پۆلەکانی یەک، دوو، سێی سەرەتاییە.

 

لێدوانی فەرمی: سامان سیوەیلی، وتەبێژی وەزارەتی پەروەردەی حکومەتی هەرێمی بە ئاڤا میدیای وت، ئەمڕۆ بە بەشداری یەک ملیۆن و 387 هەزار و 895 قوتابی تاقیکردنەوەی پۆلە ناکۆتاکان دەستیپێکرد و ئامادەکارییەکان هەمووی تەواو کراون، تاقیکردنەوەکان بەجۆرێکە قوتابی ئەگەر لە هەموو مادەکانیش دەرنەچێت، دەرفەتی هەیە لە خولی دووەم تاقیکردنەوەکان ئەنجام بداتەوە.

 

سەبارەت بە تاقیکردنەوەی پۆلی 12ـی بنەڕەتی وتەبێژی وەزارەتی پەروەردە دەڵێت: 

- پرسیاری پۆلی 12ـی ئامادەیی بە چوار زمان و دوو شێوەزار دادەنرێت.

- ڕێکاری توند بۆ بەرگرتن لە گزیکردن گیراوەتەبەر ئامێری پەکخەر، پشکنینی پێشوەختە، ڕاگرتنی ئینتەرنێت ئەمانە هەمووی پەیڕەو دەکرێن.

- پێویستە قوتابی پۆلی 12 وەڵامەکان لەسەر وەرەقەی سۆما بداتەوە و لەسەر پرسیارەکان وەڵام نەنوسێت.

ئەوەی پێویستە بیزانیت: تاقیکردنەوەی پۆلە ناکۆتاکان، لە 17-5-2025 دەستیپێکرد، تا 26-5 بەردەوام دەبێت. لە 1-6 تاقیکردنەوەی پۆلی 12ـی ئامادەیی دەستپێدەکات.