سەبارەت بە خاوێنیی ئاوی پڕۆژەی فریاگوزاریی خێرای هەولێر دڵنیایی دەدرێت

ئاڤا نیوز

 

كاركردن لە پڕۆژی فریاگوزاریی خێرای ئاوی هەولێر بەردەوامە و سەرپەرشتیاری پڕۆژەكە دەڵێ، هەموو هەوڵێك بۆ ئەوەیە كە ناوەڕاستی مانگی شەش هێڵێكی پڕۆژەكە تەواو بێت و ئاو بگاتە خەڵك.

 

وێنە گەورەکە: لە ماوەی ڕابردوو، بەهۆی دابەزینی ئاستی ئاوی ژێر زەوی لە هەولێر چەند گەڕەکێک دووچاری کەمئاوی بوونەوە، بەڵام بۆ هاوینی ئەمساڵ ئاوی پڕۆژەی ستراتیژی فریاگوزاریی خێرای ئاوی هەولێر دەگاتە گەڕەکەکان و تا 30 ساڵی داهاتوو کێشەی کەمئاوی چارەسەر دەبێت.

لێدوانی فەرمی: ئەندازیار هێمن نەزیف، سەرپەرشتیاری پڕۆژەی فریاگوزاری خێرای ئاوی هەولێر بە ئاڤای ڕاگەیاند: پڕۆژەكە زۆر بە خێرایی جێبەجێ دەكرێت، بەشێوەیەكە كە خێراترە لەوەی پلانی بۆ داڕێژدراوە، وێستگەی پڕۆژەكە دوو هێڵە و هەموو هەوڵێكمان بۆ ئەوەیە كە تاوەكوو ناوەڕاستی مانگی شەش هێڵێكیان تەواوبێت بەمەش ئاو دەگاتە ناو شاری هەولێر.

 

زانیاریی زیاتر: بەپێی گوتەی سەرپەرشتیاری پڕۆژەكە، ئاوی پڕۆژەكە بە چەندین فیلتەردا دەڕوات بۆ ئەوەی پاكبێتەوە و بگاتە ستانداردی خواردەوە، هاوكات دڵنیاییش دەداتە دانیشتووانی هەولێر كە ئەو ئاوەی دەگاتە نێو ماڵان زۆر خاوێنە و بێ گرفتە.

 

ئەوەی پێویستە بیزانیت: ئێستا زیاتر لە %75 ـی کارەکانی پڕۆژەی فریاگوزاریی خێرای ئاوی هەولێر تەواوبووە.

 

ئەمەش بزانە: ئەو بڕە ئاوەی لە پڕۆژەكە بەرهەم دەهێندرێت نیو ملیۆن مەتر سێجایە، ئەمەش واتا توانای دابینكردنی ئاوی بۆ دوو ملیۆن كەس هەیە لە ڕۆژێكدا.