بەریتانیا بە زمانی كوردی مەترسییەكانی كۆچی نایاسایی دەخاتەڕوو

ئاڤا نیوز

 

ماڵپەڕی فەرمیی حكومەتی بەریتانیا چەند ڕاستییەك دەربارەی كۆچی نایاسایی بۆ بەریتانیا بە زمانی كوردی بڵاودەكاتەوە، هۆشداریش بە كۆچبەران دەدات لەوەی ببنە قوربانیی باندەكانی بازرگانیكردن بە مرۆڤ.

 

وێنە گەورەکە: ماڵپەرەکە کە سەر بە حکومەتی بەریتانیایە، خاڵە نەرێنییەکان، مەترسییەکان و هۆکارەکانی کۆچکردنی بە زمانی کوردی - سۆرانی بڵاوکردووەتەوە. ئەمەش لەپێناو هۆشیارکردنەوەی کۆچبەرانی کورد کە بە بەشێوەی قاچاخ دەچنە بەریتانیا.

 

خاڵە نەرێنییەكان: حكومەتی بەریتانیا ئاماژە بەوە دەكات، هەوڵی هاتنە ناو بەریتانیا بە قاچاخ جگە لەوەی تێچووی زۆرە، لە هەمان كاتدا بەپێی یاسای نوێی كۆچ، كۆچبەر دەستگیر دەكرێت و دیپۆرت دەكرێتەوە، ئەگەریش كۆچبەر خۆی لە حكومەت بشارێتەوە، ئەوا ئەگەری دەستكەوتنی كار و پەیداكردنی بژێوی ژیان، ئێجگار سەخت دەبێت و لە هیچ شوێنێك كاری دەست ناكەوێت.

 

مەترسی پێشبینیكراو: باندەكانی بەقاچاخبردن، بەردەوام ئەوە بە كۆچبەران دەڵێن كە "گەیشتن بە بەریتانیا هیچ مەترسییەكی نییە." بەڵام ئامارەكانی ساڵانی ڕابردوو ئاشكرای دەكەن، دەیان كەس لە هەوڵی گەیشتن بەو وڵاتە لەڕێگەی بارهەڵگرەكان یاخود بەلەمی بچووك، گیانیان لەدەستداوە یاخود بە سەختی بریندار بوون و ئەندامی جەستەیان بەیەكجاری پەكی كەوتووە. هاوكات ئەگەری بەكۆیلەكردنی كۆچبەران هەیە لەلایەن تۆڕەكانی بازرگانیكردن بە مرۆڤ، بەو پێیەی هیچ ناسنامەیەكی نییە و هیچ لایەنێكی فەرمیش داكۆكی لێ ناكات و وەك هاووڵاتییەكی ئاسایی مافەكانی پارێزراو نییە.

 

هۆكارە زانراوەكان: قاچاخچییەكان لەپێناو دەسكەوتنی زۆرترین قازانج، زۆرترین كۆچبەر لەنێو بەلەمی بچووك باردەكەن كە ئەمەش كێشی بەلەمەكە قورس دەكات و ئەگەری نغرۆبوون یاخود تێكشكانی، لە ئان و ساتدایە.

ماڵپەرەکە بەزمانی کوردی باسی کەناڵی ئینگلیز دەکات و نووسیویەتی، "ساردی ئاوی كەناڵی ئینگلیز وا دەكات، لەكاتی نقومبوونی بەلەم، تیمەكانی فریاگوزاری نەتوانن دەستبەجێ بگەنە شوێنی ڕووداوەكە و سەرەنجام لە سەرما ڕەق دەبنەوە.

لە بەشێکی دیکەی بڵاوکراوەکەی ماڵپەرەکە، هۆشداری دراوە کە، "كوشتن یاخود برینداربوونی سەختی ئەوانەی خۆیان بە ژێری بارهەڵگرەكانەوە دەلكێنن".

 

لەلایەکی دیکە: بەریتانیا و وڵاتانی یەكێتیی ئەوروپا بەهەماهەنگی کاردەکەن بۆ ڕێگەگرتن لە هاتنەناوەوەی كۆچبەرانی نایاسایی بۆ بەریتانیا، بۆ ئەم مەبەستەش ڕێككەوتنی فەرمی لەنێوانیان واژۆ كراوە و كەوتووەتە بواری جێبەجێكردن. 

 

باکگراوند: ساڵانە بەڕێگەی قاچاخ و نایاسایی، هەزار کەس لە وڵاتانی ڕۆژهەڵاتی ناوەڕاست، لەنێویاندا سووریا، عێراق و هەرێمی کوردستان، هەروەها وڵاتانی ئەفریقا دەچنە بەریتانیا، بەوهۆیەشەوە دەیان کەس لەڕێگەی گەیشتن بەو وڵاتە بوونەتە قوربانی.