لە کۆبوونەوەی ئەنجوومەنی وەزیران کێ دەنگی بە پرۆژەی ڕووناکی نەداوە؟

ئاڤا نیوز

لە کۆبوونەوەی ئەنجوومەنی وەزیران پرۆژەی ڕووناکی پەسەند کرا، وەزیری کاروباری شەهیدان و ئەنفالکراوان  دەڵێت 'تەنیا یەک وەزیر دەنگی بە پڕۆژەکە نەدا'.

چیرۆکی سەرەکی: ڕۆژی چوارشەممە 14-5-2025، بەسەرپەرشتی سەرۆکوەزیران مەسرور بارزانی، کۆبوونەوەی ئەنجوومەنی وەزیرانی هەرێمی کوردستان بەڕێوەچوو، بە کۆی دەنگ ڕەشنووسی پڕۆژەی ڕووناکی پەسەند کرا، بەڵام ئەوەی بووە جێی قسە و باس ئەوەبوو کە وەزیرێک دەنگی بە پڕۆژەکە نەداوە.

لێدوانی فەرمی: عەبدوڵڵا حاجی مەحموود، وەزیری کاروباری شەهیدان و ئەنفالکراوان، بە ئاڤا میدیای ڕاگەیاند: سەرجەم وەزیرەکان بەوانەی یەکێتیشەوە، جگە لە کەمال موسلیم وەزیری بازرگانی و پیشەسازی، دەنگیان بە پڕۆژەی کارەبای 24 کاتژمێری دا.

- وەزیری کاروباری شەهیدان و ئەنفالکراوان دەڵێت: نازانین هۆکاری دەنگ نەدانی کاک کەمال چی بوو، دەبێت لە خۆی بپرسرێت کە بۆ دەنگی نەداوە.

لەلایەکی دیکەوە: ئاڤا پەیوەندی بە کەمال موسلیم، وەزیری بازرگانی و پیشەسازی کرد، "بەڵام پێی ڕاگەیاندین کە هیچ قسەیەک لەبارەی هۆکاری دەنگنەدانی بە پڕۆژەی ڕووناکی ناکات".

ئەوەی پێویستە بیزانیت: پڕۆژەی ڕووناکی بڕگەیەکی پەسەندکراوی کارنامەی کابینەی نۆی حکومەتی هەرێمی کوردستانە کە لە مانگی تەمووزی ساڵی 2019 پەسەند کرا، هەروەها یەکێکە لە دەستكەوتە گرنگەکانی حکومەت و داوا و خواستی چەندین ساڵەی هاووڵاتیانی هەرێمی کوردستانە.