فایلی خەڵک؛ ئاڤا بەدواداچوون بۆ گرفتەكانی پرۆژەی بامۆك لە گەرمیان دەكات

ئاڤا نیوز

دانیشتوانی پرۆژەیەکی نیشتەجێبوون لە گەرمیان بەدەست کۆمەڵێک گرفتەوە دەناڵێنن، داوا لە ئاڤا دەکەن دەنگیان بگەیێنن.

وێنە گەورەکە: پرۆژەی نیشتەجێبوونی بان ستی لە گەرمیان کە نزیکەی 810 خانوون، کۆمەڵێک گرفتی هەیە، یەکێک لە گرفتەکان ئەوەیە کە بەنایاسایی مۆڵەت دراوە بە دروستکردنی 210 خانووی زیادە لەسەر ڕووبەری سەوازیی و قوتابخانە و بنکەی تەندرووستی.

ئەوەی پێویستە بیزانیت: پرۆژەکە تاوەکو ئێستا تەواو نەکراوە، بەڵام خەڵکیان کردووەتە ناو پرۆژەکەوە. هاوکات خەڵکانێک هەن کێشەی ڕادەستکردنی خانووەکانیان هەیە، گرێبەستیان هەیە و هێشتا خانووەکانیان ڕادەست نەکردوون.

لێدوانی فەرمی: هونەر مەحموود، بەڕێوەبەری وەبەرهێنانی گەرمیان لەوبارەیەوە دەڵێت: ئەو پرۆژەیە تایبەت نییە بە سندووقی نیشتەجێبوون تا دابینكردنی خزمەتگوزارییەكان لەسەر ئێمە بێت.

- كاتی خۆی بە ڕێككەوتنی كۆمپانیا و سەندیكای پیشەوەران دراوەتە بەشداربووان، بۆیە ئەوانەی سەردانیان كردووین، ڕێككەوتنی سەندیكا و گرێبەستی نێوانیانمان كردووەتە بنەمای مامەڵەكردنیان،  بەڵام بەداخەوە خەڵكانێكی زۆر بە ئێستاشەوە ئەو گرێبەستەیان نەخوێندووەتەوە و لەكاتی كڕینی خانووەكان، بەبێ ئاگایی ئیمزایان كردووە كە لە بەشێك لە بڕگە و خاڵەكانی ڕێككەوتنەكە، كۆمپانیای جێبەجێكار خۆی بەدەر دەكات لە هەبوونی كەموكوڕی و دابینكردنی بەشێك لە خزمەتگوزارییەكان.

- هەرچەندە لایەنی ئیداریی دەڤەرەكە ئامادەیی دەربڕیوە لەجیاتی كۆمپانیاكە، پرۆژە خزمەتگوزارییەكانی بان ستی جێبەجێ بكات، بەڵام بەبیانووی نەبوونی پارە و بودجە، هیچ بڕە پارەیەك بۆ تەواوكردنی ئەو پرۆژانە تەرخان نەكراوە، ئەو بابەتە بەرزكراوەتەوە بۆ دەستەی وەبەرهێنان تا لەڕێگەی لایەنی باڵای حكومییەوە بودجەی بۆ تەرخان بكرێت.