ئەڵمانیا لەڕێگەی ئاڤاوە داوا دەکات مافی کورد لە تورکیا بدرێت

ئاڤا نیوز 

ئەڵمانیا پێشوازی لە ڕاگەیێنراوی کۆنگرەی پەکەکە بۆ چەکدانان و خۆهەڵوەشداندنەوە دەکەن و بە شکاندنی سووڕی دەیان ساڵەی تیرۆر و تووندوتیژی لە تورکیا و ناوچەکە دەزانن.

وێنە گەورەکە: بڕیاری پەکەکە بۆ چەکدانان و خۆهەڵوەشاندنەوە بە قۆناغێکی نوێ و گرنگ دادەنرێت بۆ کورد لە باکووری کوردستان و تورکیا، نەمانی شەڕ و سەرکەوتووبوونی پرۆسەی ئاشتی دەبێتە هۆی سەقامگیری بۆ هەر چوار پارچەی کوردستان و تەواوی ڕۆژهەڵاتی ناوەڕاست، بۆیە زۆربەی وڵاتانی جیهان پێشوازی و پشتیوانی لێ دەکەن و بە دەرفەتێکی مێژوویی دەبینن.

لێدوانی فەرمی: کونسوڵخانەی ئەڵمانیا لە هەرێمی کوردستان بە ئاڤا میدیای ڕاگەیاند، ڕاگەیاندنی هەڵوەشاندنەوەی پەکەکە هەنگاوێکی بەرچاوە بۆ شکاندنی سووڕی دەیان ساڵەی تیرۆر و توندوتیژی و تۆڵەسەندنەوە لە تورکیا و ناوچەکە.

بۆ ئێستا زۆر گرنگە بە تەواوی پڕۆسەکە جێبەجێ بکرێت، لەوانەش چەک داماڵینی پەکەکە و هێنانە کایەی پرۆسەیەکی سیاسی.

هەر چارەسەرێکی بەردەوام پێویستی بە ڕێزگرتن و پاراستنی مافە ڕۆشنبیری و دیموکراسییەکانی کورد لە تورکیا هەیە.

لەلایەکی دیکەوە: زاگرۆس هیوا وتەبێژی کۆما جڤاکێن کوردستان ڕایگەیاند، دانوستان بۆ ئاشتی هێشتا دەستی پێنەکردووە، ئەو بڕیارەی لە کۆنگرەی 12 درا، وەک کۆتاییهێنان بە شێوازی خەباتی چەکداریی پێناسەکراوە، کەس باسی دانانی چەک و ڕادەستکردنی چەکی نەکردووە، لەبەرئەوەی ئێستا زەمینەی دانان و ڕادەستکردنی چەک بوونی نییە و ڕۆژانە هێرشی تورکیا بۆسەر پێگەکانی پەکەکە بەردەوامە.

باکگراوند: دوای بانگەوازەکەی عەبدوڵڵا ئۆجەلان لە 27ـی شوباتی ئەمساڵ، لە 5 بۆ 7ـی ئەم مانگە پەکەکە 12ـیەمین کۆنگرەی خۆی بەست، ڕۆژی 12 مانگیش بڕیارەکانی کۆنگرەی ئاشکرا کرد و ڕایگەیاند، خۆیان هەڵدەوەشێننەوە و کۆتایی بە خەباتی چەکداری دەهێنن، ئەمەش کاردانەوەی ناوخۆیی و جیهانی بەدوای خۆیدا هێنا و زۆربەی وڵاتان پێشوازی لەو بڕیارەدەکەن.