سەرۆکوەزیران مەسرور بارزانی لەگەڵ بەرپرسانی باڵای ئیدارەی ترەمپ کۆدەبێتەوە

ئاڤا نیوز

 

سەرۆکوەزیران مەسرور بارزانی لەسەر بانگهێشتی حکومەتی ئەمریکا بە سەردانێکی فەرمی گەیشتە واشنتن و بڕیارە ژمارەیەک دیدار و کۆبوونەوەی گرنگی لەگەڵ بەرپرسانی باڵای ئەو وڵاتە هەبێت و بەشداریش دەکات لە کۆڕبەندی داهاتووی وزە لە هەرێمی کوردستان، کە لە ئەمریکا بەڕێوەدەچێت.

 

وێنە گەورەکە: ڕۆژی شەممە، ڕێککەوتی 17-5-2025، سەرۆکوەزیران مەسرور بارزانی و شاندێکی یاوەری کە پێکهاتبوون لە وەزیری سامانە سروشتییەکان، وەزیری کارەبا، وەزیری پێشمەرگە، سەرۆکی فەرمانگەی پەیوەندییەکانی دەرەوە، سکرتێری ئەنجوومەنی وەزیران، ڕاوێژکاری باڵا بۆ کاروباری دەرەوە، لەسەر بانگێشتی فەرمی ئەمریکا سەردانێک گەیشتنە واشنتن.

 

زانیاریی پەیامنێر: کوردستان حەسەن، پەیامنێری ئاڤا لە واشنتن ڕایگەیاند: بەپێی خشتەی سەردانەکەی سەرۆکوەزیران مەسرور بارزانی، چەندین دیدار و کۆبوونەوەی لەگەڵ کاربەدەستانی ئەمریکا دەبێت، لەوانە مارکۆ ڕۆبیۆ، وەزیری دەرەوە هەروەها سیناتۆر و ئەندامانی کۆنگرێس، نوێنەری ترەمپ بۆ کاروباری ڕۆژهەڵاتی ناوەڕاست.

 

زانیاریی زیاتر: پرسی پێکهێنانی کابینەی 10، هەروەها پرسی یەکخستنەوەی هێزەکانی پێشمەرگە و هاوکاری لۆجستی و دارایی ئەمریکا، تەوەرێکی دیکەی گفتوگۆکانی نێوان بەرپرسانی ئەمریکا و سەرۆکوەزیران مەسرور بارزانی دەبێت.

 

زانیاریی بەدەستهاتوو: هەر لە سەردانەکەیدا، بڕیارە سەرۆکوەزیران مەسرور بارزانی بەشداریی کۆڕبەندی وزە بکات، هەروەها گفتوگۆی تایبەتی سەبارەت بە کەرتی وزە لە هەرێمی کوردستان دەبێت.