تەقینەوەیەک لە سووریا ڕوویدا، کوژراو و بریندار هەن

ئاڤا نیوز

ئۆتۆمبێلێکی بۆمبڕێژکراو لە نزیک بنکەیەکی پۆلیس لە شاری ئەلمەیادین لە پارێزگای دێرەزووری سووریا تەقیەوە و بەهۆیەوە لانیکەم سێ پۆلیس کوژران و چەند کەسێکی دیکەش برینداربوون.

ڕاگەیێنراوی فەرمی: ڕوانگەی سووری بۆ مافەکانی مرۆڤ بڵاویکردەوە، تەقینەوەکە لەکاتێکدا ڕوویداوە هێزە ئەمنییەکان سەرقاڵی گەڕان بوون بە دوای چەکی بێ مۆڵەتدا و لە نزیک بەندینخانەی شارەکە لە ڕێگەی ئۆتۆمبێلێکی بۆمبڕێژکراوەوە کراونەتە ئامانج.

زانیاریی زیاتر: پێشتر، ئەم شارە بە قەڵای میلیشیاکانی نزیک لە ئێران دادەنرا، لە چەند مانگی ڕابردوودا بڵاوبوونەوەی چەک لە نێو خەڵکدا زیادیکردووە و حکومەتی نوێی سووریا دەیەوێت دیاردەکە کۆنتڕۆڵ بکات.

ئەوەی پێویستە بیزانیت: هێزە ئەمنییەکان سەرجەم خاڵەکانی چوونە ژوورەوە و دەرچوونیان بۆ شارەکە داخستووە و دەستیانکردووە بە گەڕان بەدوای چەکی بێ مۆڵەت و حەشارگە گومانلێکراوەکانی چەکدارانی نزیک لە ئێران.