پزیشکێکی کورد لەسەر ئاستی وڵاتانی عەرەبی یەکەم دەبێت

ئاڤا نیوز

 

دکتۆرێکی کورد لەسەر ئاستی وڵاتانی عەرەبی پلەی یەکەم لە تاقیکردنەوەی کرداریی پسپۆریی هەناو لە بۆردی پزیشکیی عەرەبی بەدەستهێنێت.

 

وێنە گەورەکە: پزیشکێکی کوردی شاری هەولێر لە سەر ئاستی وڵاتانی عەرەبی و لەنێو 92 پزیشکی ڕاهێنراوی هەناوی دا، پلەی یەکەم لە تاقیکردنەوەی کۆتایی بۆردی عەرەبی بۆ پسپۆریی هەناو بەدەست دەهێنێت، هەروەها یەکەمجارە پزیشکێکی کورد دەگاتە ئەو ئاستە بەرزە.

 

لێدوانی فەرمی: د. هێرش قادر دەربەندی، لەوبارەیەوە بە ئاڤای ڕاگەیاند: لە ساڵی 2020ـەوە دەستم بە خوێندنی بۆردی عەرەبی کردووە لە پسپۆڕی هەناو، تاقیکردنەوەی کۆتایی بەشێوەی کرداری لە شاری بەسڕە بەڕێوەچوو، توانیم پلەی یەکەم لەنێو 92 پزیشکی ڕاهێنراوی بۆردەکە بۆ پسپۆڕییە پزیشکییەکان بەدەستبهێنم، ئەمەش سەرنجی بەڕێوەبەرانی بۆردەکەی ڕاکێشاوە، بەوەی پزیشکێکی کورد توانیویەتی پلەی یەکەمی سەر ئاستی وڵاتانی عەرەبی بەدەستبهێنێت.

 

زانیاریی زیاتر: بۆردی عەرەبی بەرزترین دامەزراوەی خوێندنی باڵای پزیشکییە لە سەر ئاستی وڵاتانی عەرەبی، چونکە دکتۆرە ڕاهێنراوەکان لە تەواوی وڵاتە عەرەبییەکاندا بەشداریی دەکەن و پێشبڕکێی سەرکەوتن بەڕێوەدەچێت.

 

گۆشەیەکی دیکەی دیمەنەکە: لە شاری هەولێر حەوت دکتۆری ڕاهێنراوی بۆردەکە بەشداریان لە تاقیکردنەوەکەدا کردووە، شەش کەسیان دەرچوون، هەروەها لە سلێمانی حەوت کەس بەشدارییان کردووە و یەک کەسیان لە تاقیکردنەوەکە دەرچووە.