وەزیری سامانە سروشتییەكان بۆ ئاڤا: گرێبەستەكان ژێرخانی وزەی كوردستان دەباتە قۆناغێكی نوێ

ئاڤا نیوز

وەزیری سامانە سروشتییەكانی هەرێمی كوردستان كە ئێستا لەگەڵ شاندی باڵای حكومەتی هەرێمی كوردستان لە واشنتنە، تایبەت بە ئاڤا ڕایدەگەیەنێت، گرێبەستە واژۆكراوەكان لەگەڵ كۆمپانیا ئەمریكییەكان، بەرهەمهێنانی كارەبا دەباتە ئاستێكی بەرز، هاوكات یارمەتیدەرێكی باشی پرۆژەی ڕووناكیی كارەبای 24 كاتژمێریش دەبێت كە ئێستا پرۆژەكە قۆناغی زۆر باشی بڕیوە.

چیرۆکی سەرەکی: ڕۆژی دووشەممە ڕێککەوتی 2025-05-19، بە سەرپەرشتی سەرۆکوەزیران مەسرور بارزانی، وەزارەتی سامانە سروشتییەکانی کوردستان و کۆمپانیاکانی 'ئێچ کەی ئینێرجی' و 'وێسترن زاگرۆس'ـی ئەمریکی، دوو گرێبەستیان لەبواری نەوت و وزە واژۆ کرد، گرێبەستەکان هەرێمی کوردستان و عێراق لەبواری وەبەرهێنان لە کەرتی غاز و نەوت دەباتە قۆناغێکی دیکەوە و جگە لە زیادکردنی بەرهەمهێنانی غاز و نەوت، وادەکات بەهۆیانەوە کارەبا بۆ هەموو عێراق بەرهەمبهێنرێت.

لێدوانی فەرمی: كەمال محەممەد، وەزیری سامانە سروشتییەكانی هەرێمی كوردستان بە ئاڤای ڕاگەیاند، گرێبەستەكان سەرچاوەی نوێی سووتەمەنی بۆ هەرێمی كوردستان دابین دەكات كە ژێرخانی وزەی كوردستان دەباتە قۆناغێكی نوێ.

بەتەنیشت ئەم بابەتەوە: كەمال محەممەد، باسی لەوەشكرد، پرۆژەی ڕووناكی قۆناغی زۆر باشی بڕیوە و تا كۆتایی ئەم مانگە ژمارەی ئەو هاوبەشانەی دەبنە خاوەنی كارەبای 24 كاتژمێری دەگاتە 280 هەزار هاوبەش، پلانی وەزارەت ئەوەیە لە ساڵی 2025، سەرجەم سەنتەری شارەكانی هەرێمی كوردستان كارەبای 24 كاتژمێریی پێ بگات. لە 2026ـش بگاتە شارۆچكە و شوێنەكانی دیكە، دابینكردنی سووتەمەنی پێویست بۆ وێستگەكانی بەرهەمهێنانی كارەبا، پرۆژەكە لەڕووی پراكتیكییەوە سەركەوتووتر دەكات.