دڵنیایی لەبارەی كوالێتیی ئاوی ماڵان دەدرێت

ئاڤا نیوز

 

بەڕێوەبەری ئاوی هەولێر، سەبارەت بە پاكیی ئەو ئاوەی كە ڕۆژانە دەگاتە دانیشتووانی سنووری پارێزگاكە دڵنیایی دەدات و دەڵێت، ڕۆژانە پشكنین بۆ ئاوی زۆرینەی گەڕەكەكان دەكرێت و هەر گرفتێك هەبێت بە زوویی چارەسەر دەكرێت.

 

لێدوانی فەرمی: ڕابەر حوسێن، بەڕێوەبەری ئاوی هەولێر بە ئاڤا میدیای ڕاگەیاند: ئەركی سەر شانی ئێمەیە كە بڕی ئاوی پێویست بۆ هاووڵاتیان بە كوالێتییەكی باش دابین بكەین، حكومەتی هەرێمی كوردستان ئەوپەڕی توانا و هەوڵی خۆی بۆ ئەو مەبەستە خستووەتە گەڕ، تەنیا لە ساڵی ڕابردوو 158 ملیار دینار لە پڕۆژەكانی ئاو خەرج كراون.

 

زانیاریی زیاتر: بەپێی گوتەی بەڕێوەبەری ئاوی هەولێر، ڕۆژانە تاقیگەی كۆنتڕۆڵی جۆریی بەڕێوەبەرایەتیی ئاوی هەولێر، بە شێوەیەكی هەڕەمەكی لە گەڕەكەكانی شاری هەولێر دەگەڕێن و نموونەی ئاوی ماڵان وەردەگرن بۆ ئەوەی لە كوالێتیی و پیسنەبوونی ئاو دڵنیا ببنەوە. هاوكات لە هەر شوێن و گەڕەكێك سكاڵایەك سەبارەت بە پیسبوونی ئاو هەبێت بە زووترین كات تیمەكان پشكنین دەكەن، ئەگەر گرفتێك هەبێت چارەسەری دەكەن.

 

لەلایەكی دیكەوە: هەر سەبارەت بە پاكیی ئەو ئاوەی كە دەگاتە دانیشتووانی سنووری پارێزگای هەولێر، بەڕێوەبەری ئاوی هەولێر دڵنیایی دەدات و دەڵێت، ئاوەكە زۆر پاكە و كوالێتییەكی باشی هەیە و بەپێی ستاندارە، جگە لە ئاوی بیرەكان، ئەو ئاوەی كە لە زێ بەرهەم دێت، بە چەندین پڕۆسەدا دەچێت تاوەكوو پاك دەكرێتەوە و لە ڕووی كیمیایی و بایۆلۆژییەوە دڵنیایی وەردەگیرێت ئینجا دەگات بە ماڵان.