تورکیا دەیەوێت هاوشێوەی ئێران ڕێككەوتنێكی ئەمنی لەگەڵ عێراق بكات

ئاڤا نیوز

هاوشێوەی ئەو ڕێككەوتنەی ئێران و عێراق لەبارەی حیزبە ئۆپۆزیسیۆنەكانی ڕۆژهەڵاتی كوردستان كردیان، توركیاش دەیەوێت ڕێككەوتنێك لەبارەی پەکەکە لەگەڵ عێراق بكات.

زانیارییە بەدەستهاتووەکان: بەپێی زانیاری چەند سەرچاوەیەك کە قسەیان بۆ ڕۆژنامەی مەدای عێراقی کردووە، تورکیا دەیەوێت هاوشێوەی ئەو ڕێككەوتنەی ئێران لەگەڵ عێراقی کردووە بۆ دەركردنی لایەنە ئۆپۆزسیۆنەكانی تاران لە هەرێمی كوردستان، ئەویش ڕێککەوتنێک بکات بۆ دەرکردن و دوورخستنەوەی گەریلاکانی پەکەکە.

ڕێككەوتنەكە بەمشێوەیە: پەکەکە لە قەندیل دەربکرێت و لە سنووریش دووربخرێتەوە، بەوەی پشتێنەیەکی ئەمنی لە نێوان باشوور و باکووری کوردستان دروست بکرێت، مەرجێكی تارانیشی تێدایە بەوەی قەینا پەكەكە لە قەندیل دووربخرێتەوە، بەڵام لە شنگال بمێنێتەوە.

گۆشەیەکی دیکە: بەگوتەی سەرچاوەكان "تاران هێشتا دڵنیا نییە لە ڕێوشوێنەكانی بەغدا بەرامبەر  حیزبە كوردییەكانی ڕۆژهەڵاتی كوردستان، بە دوورخستنەوەیان لەسەر سنوورەكان ڕازی نییە و دەیەوێت داواكراوەكانی ڕادەست بكرێن و ئەوانی دیكەش بكرێنە دەرەوەی عێراق، لەبەرئەوە نایەوێت ئەو ڕێككەوتنەی نێوان ئەنقەرەوە بەغدا زۆر فراوان بێت، چونكە هێشتا كۆنترۆڵی شنگالی بەدەستەوەیە".

باكگراوند: ساڵی 2020 هەولێر و بەغدا بۆ ئاساییکردنەوەی دۆخی شارەکە ڕێککەوتنی شنگالیان واژووکرد، بەڵام بەهۆی دەرنەچوونی گەریلاكانی پەكەكە و حەشدی شەعبی لە شنگال ڕێككەوتنەكە جێبەجێ نەكرا.