ئاڤای خەڵک؛ گوندێکی سنووری کۆیە نزیکەی 13 ساڵە داوای قیرتاوکردنی ڕێگای گوندەکەیان دەکەن

ئاڤا نیوز

دانیشتووانی گوندی سوسێی سەر بە بناری چیای سەفین لە قەزای کۆیە گلەیی لە ڕێگا و بانی گوندەکەیان دەکەن و داوا دەکەن ڕێگاکەیان بۆ قیرتاو بکرێت. قایمقامی کۆیەش دەڵێت، "دەرخستەکەیان لە پارێزگایە و چاوەڕێی وەڵامین".

چیرۆکی سەرەکی: ژمارەیەک هاووڵاتیی گوندی سوسێ لە بناری چیای سەفین کە سەر بە قەزای کۆیەن، پەیوەندی بە ئاڤا میدیاوە دەکەن، "دەڵێن ڕێگای سەرەکی گوندەکەمان کە نزیکەی پێنج کیلۆمەترە، زۆر خراپە و تا ئێستا قیرتاو نەکراوە. دەشڵێن زۆر ماندوو و هیلاک بووین و واستە نەما نەیکەین، بەڵام تا ئێستا کێشەکەیان بۆ چارەسەر نەکردووین، داوا دەکەین ئاڤا میدیا بە دواداچوونمان بۆ بکات، بەڵكو دەنگمان بگاتە شوێنی مەبەست".

بەدواداچوونی ئاڤا: قارەمان عومەر سوسەیی، نوێنەری گوندی سوسێی خۆشناوەتی و ئەندامی ئەنجوومەنی ڕیش سپی و پیاوماقوڵانی گوندی سوسێ دەڵێت، گوندی سوسێ نزیکەی 100 ماڵە تاوەکو ئێستا قیرتاو نەکراوە، کەچی گوندەکانی دەوروبەری سوسێ 20 تا 30 ماڵ دەبن، هەموویان ڕێگاکەیان قیرتاو کراوە.

ئەو هاووڵاتییە ئاماژە بەوە دەکات، ڕێگای سەرەکی گوندەکەیان چوار کیلۆمەتر و 800 مەترە. دەشڵێت، "لە ساڵی 2023 سەردانی پارێزگاری هەولێرمان کرد و نووسراوی فەرمیمان هەیە کە لە پلانی ساڵی 2024 جێبەجێ بکرێ، بەڵام تاوەکو ئێستا جێبەجێ نەکراوە".

هاوکات، ئاماژە بەوەش دەکات، لە ساڵی 2013ـەوە چەندین جار بەڵێنیان پێدراوە کە ئەو کێشەیەیان بۆ چارەسەر بکرێت، بەڵام تاوەکو ئێستا وەکو خۆی ماوەتەوە.

لێدوانی فەرمی: حاکم تاریق حەیدەری، قایمقامی کۆیە بە ئاڤا میدیای ڕاگەیاند، "پێشتر لەگەڵ ئومێد خۆشناو، پارێزگاری هەولێر و شێخ باز بەرزنجی، خاوەنی کۆمپانیای کار گرووپ سەردانی ئەو گوندەمان کردبوو، ئەو کاتە شێخ باز بە نیاز بوو ئەو پرۆژەیە جێبەجێ بکات  کە بەپێی دەرخستەکە 220 ملیۆن دیناری پێویست بوو، بەڵام خەڵکەکە داوایان کرد بەشێکی دیکەش لە ڕێگای ناو گوندەکە قیرتاوبکرێت، بۆیە دەرخستەیەکی دیکەمان ئامادە کرد کە 450 ملیۆن دینار بوو".

حاکم تاریق دەڵێت، دوای دەرکردنی دەرخستەی دووەم، نووسراومان بۆ پارێزگای هەولێر بەرزکردەوە، چونکە ئەو بە نیاز بوو لەگەڵ کۆمپانیای کار یاخود لەسەر بودجەی پەرەپێدانی پارێزگا جێبەجێی بکات، "تا ئێستا دەرخستەکە لە پارێزگای هەولێرە و وەڵاممان وەرنەگرتووەتەوە".