ترەمپ و سەرۆکی سێ وڵات ڕێککەوتنی ئاشتییان لە غەززە واژۆ کرد

ئاڤا نیوز

سەرۆکی ئەمریکا و سەرۆکی وڵاتانی میسر و قەتەر و تورکیا ڕێککەوتننامەی ئاشتیی لە غەززە واژۆکرا، ترەمپ لەمیانەی ڕێککەوتنەکە ڕایگەیاند: گەیشتین بە چارەسەری ئەو ناکۆکییەی سێ هەزار ساڵە بەردەوامە.

چیرۆکی سەرەکی: ئێوارەی ئەمڕۆ دووشەممە ڕێککەوتننامەی ئاشتیی لە غەززە واژۆکرا، دۆناڵد ترەمپ، سەرۆکی ئەمریکا و عەبدولفەتاح سیسی، سەرۆکی میسر و ڕەجەب تەیب ئەردۆغان، سەرۆککۆماری تورکیا و میری قەتەر واژۆیان لەسەر رێککەوتنی ئاشتیی لە ڕۆژهەڵاتی ناوەڕاست کرد کە شەڕی نێوان ئیسرائیل و حەماس ڕادەگرێت.

لێدوانی فەرمی: دۆناڵد ترەمپ، سەرۆکی ئەمریکا گوتی، ئەمڕۆ بە فەرمی قۆناغی یەکەمی ئەم ڕێککەوتننامەیە جێبەجێکرا، ئەویش بە ئاڵوگۆڕپێکردنی بارمتە و دیلەکان بوو.

- ئەمە سەرەتایەکی دڵخۆشکەر بوو بۆ جێبەجێکردنی ئەم ڕێککەوتننامەیە، بابەتێکی دیکە ئەوەیە تائێستا تەرمی زۆر لە بارمتەکان نەدۆزراوەتەوە، بەدواداچوونیش بۆ ئەم بابەتە بەردەوام دەبێت، بەڵام ئەمە ڕێگر نابێت لە جێبەجێکردنی ڕێککەوتنەکە.

- لە بەشێکی دیکەی قسەکانیدا ترەمپ، سوپاسی هەریەک لە وڵاتانی تورکیا و میسر و قەتەری کرد کە ڕۆڵی کاریگەریان لە ڕێککەوتننامەی غەززەدا هەبووە.

- گەیشتین بە چارەسەری ئەو ناکۆکییەی سێ هەزار ساڵە بەردەوامە، هیچ کاتێک ڕێککەوتنێکی وەک ئێستا بە نێوەندگیری ئەم سەرکردە ناودار و وڵاتە زلهێزانە ڕووی نەداوە و نەکراوە.