لە هەولێر دوو کەس بەهۆی تەقەی هەڕەمەکی دوو کەسی دیکەوە بریندار دەکرێن

ئاڤا نیوز

پۆلیسی هەولێر گرتەیەکی ڤیدیۆیی بڵاودەکاتەوە کە دوو کەس بەهۆی کێشەیەکی کۆمەڵایەتییەوە لەناوەڕاستی شەقامدا دەبێتە دەمەقاڵییان و یەکێکیان تەقە لەوەی دیکە دەکات و بەو هۆیەوە دوو کەس بریندار دەبن.

وێنە گەورەکە: دووکەس كە كێشەیەكی كۆمەڵایەتییان لەنێواندا هەیە، لە ناوەڕاستی شەقام لەیەكتر دێنە خوارەوە و هاوشێوەی فیلمی مافیاكان، بەهەڕەمەكی تەقە دەكەن، بەهۆیەوە دوو كەس بریندار بوون، تەقەكەرەكانیش دەستگیركراون.

لێدوانی فەرمی: نەقیب كارزان ساڵح، وتەبێژی پۆلیسی هەولێر لەڕێگەی ئاڤا داوایەك لە هاووڵاتیان دەكات و دەڵێت، لە هەر شوێنێک بینیتان كەسێك تەقە دەكات، پەیوەندی بە هێڵی گەرمی 104 بكەن، تیمەكانی پۆلیس دەستبەجێ دەگەن.

تكایەكیش لە خەڵك دەكات، ئەوانەی كێشەی  لەنێواندا هەیە بە چەك و شەڕی دەستەویەخە كێشەكەیان چارەسەر نابێت، بەڵكو قووڵتر دەبێتەوە، بۆیە با پۆلیس ئاگادار بكەنەوە، دووپاتیشی دەكاتەوە ئەوەی تەقە بكات هەر دەبێت دەستیگر بكرێت.