پزیشكیان بۆ چوار پارێزگارەكەی هەرێمی كوردستان: با پەیوەندیی هاوسێیەتی قووڵتر بكەینەوە

ئاڤا نیوز

هەر چوار پارێزگارەكەی هەرێمی كوردستان لەگەڵ مەسعود پزیشكیان، سەرۆككۆماری ئێران كۆبوونەوە، تێیدا جەخت لە پەرەپێدانی پەیوەندییە بازرگانی، ئابووری و كولتورییەكانی نێوان هەرێمی كوردستان و ئێران كرایەوە.

وێنە گەورەكە: شاندێكی حكومەتی هەرێمی كوردستان كە پێكهاتوون لە هەر چوار پارێزگاری هەرێمی كوردستان، سەرۆكی ژوورەكانی بازرگانی و پیشەسازیی هەرێمی كوردستان و بەرپرسی پەیوەندییە دیپلۆماسییەكانی هەرێمی كوردستان و ئێران، سەردانی ئێرانیان كردووە، چەندین کۆبوونەوەی هاوبەشی نێوان پارێزگارانی پارێزگا هاوسنوورەکانی کۆماری ئیسلامی ئێران و هەرێمی کوردستان کران و چەندین ڕێککەوتن واژۆ کراون.

لێدوانی فەرمی: فاتیمە موهاجێرانی، وتەبێژی حكومەتی ئێران لە هەژماری فەرمیی خۆی لە تۆڕی كۆمەڵایەتی 'ئێكس' ڕایگەیاندوو، لەپێناو قووڵتركردنەوە و فراوانكردنی پەیوەندیی دیپلۆماسی هاوسێیەتی و سوودوەرگرتن لە ئەزموونی هاوبەشی پارێزگا سنوورییەكان، ئەمڕۆ مەسعود پزیشكیان، سەرۆككۆماری ئێران لەگەڵ چوار پارێزگاری هەرێمی كوردستان و پارێزگارانی ورمێ، سنە و كرمانشاه كۆبووەوە.

ئەوەی پێویستە بیزانیت: لە دیدارەکەدا، پزیشكیان جەختی لە پەرەپێدانی پەیوەندییە بازرگانی، ئابووریی و كولتوورییەكانی نێوان ئێران و پارێزگاكانی هەرێمی كوردستان كردەوە، هەر لەو كۆبوونەوەیە بڕیاردرا یاداشتی گەشەپێدانی پەیوەندییەكان ئامادە بكرێت.