دەستەی وەبەرهێنان بڕیارێك سەبارەت بە ڤیزای وەبەرهێنەرانی بیانی دەدات

ئاڤا نیوز

لەسەر ڕاسپاردەی نووسینگەی سەرۆكوەزیران مەسرور بارزانی، بۆ گەشەپێدان و بووژانەوەی زیاتری كەرتی وەبەرهێنان، دەستەی وەبەرهێنان چەند بڕیارێك سەبارەت بە ڤیزای وەبەرهێنەرانی بیانی دەدات.

بڵاوكراوەی فەرمی: دەستەی وەبەرهێنانی هەرێمی كوردستان ئاشكرای دەكات كە لەمەودوا نشینگە بە وەبەرهێن بۆ ماوەی سێ ساڵ بۆ پێنج ساڵ بە كەسانی بیانی، (خۆی و هاوسەر و منداڵی خوار 18 ساڵ و دایك و باوك) دەدرێت، ئەمەش بە پشتگیریی دەستەی وەبەرهێنان كە بیسەلمێنێت ناوبراو وەبەرهێنەرە، هاوكات لە دوای كۆتاییهاتنی ماوەی نشینگەكەی بۆ هەمان ماوەی ئاماژەپێكراو درێژ دەكرێتەوە بە هەمان ڕێككاری ئاماژە پێكراو.

زانیاریی زیاتر: دەستەی وەبەرهێنان سەبارەت بە نشینگەی كار ئاماژەی بە ئەوە داوە كە لەمەودوا نشینگەی كار  بۆ ماوەی زیاتر لە ساڵێك تا سێ ساڵ،  دەدرێت بە كەسی بیانی (خۆی و هاوسەر و منداڵی خوار 18 ساڵ و دایك و باوك) لە كاتی كڕینی یەكەی نیشتەجێبوون لە پڕۆژەكانی وەبەرهێنان لە هەرێمی كوردستان بەو مەرجەی نرخی یەكەكە لە 50 هەزار دۆلاری ئەمریكی كەمتر نەبێت ئەمیش بە پشتگیریی دەستەی وەبەرهێنان.

ئەوەی پێویستە بیزانیت: دەستەی وەبەرهێنان ئاماژەی بە ئەوە داوە كە ئەم بڕیارانە بۆ گەشەپێدانی زیاتر بە كەرتی وەبەرهێنان و ڕاكێشانی وەبەرهێنەری بیانی بۆ ناوخۆی هەرێمی كوردستان و ئاسانكاری بۆ پێدانی ڤیزا و نشینگە بە وەبەرهێنەر و هاووڵاتیی بیانییە.