فایلی خەڵک؛ گەڕەکێکی هەولێر بەدەست کێشەی کارەبا و خزمەتگوزارییەوە دەناڵێنن

ئاڤا نیوز

خەڵکی گەڕەکی ڕاستی لە هەولێر کە ژمارەیان نزیکەی 150 ماڵە، کێشەی کەمی خزمەتگوزارییان هەیە، هانایان بۆ ئاڤا هێناوە و دەڵێن، "بێزار بووین".

ئەوەی پێویستە بیزانیت: بە گوێرەی قسەکانی دانیشتووانەکەی، ئەو گەڕەکە 200 قوتابییان هەیە و تاوەکو ئێستا هیچ قوتابخانەیەک لەگەڕەکەکەیاندا نیە. هاوکات لە تەواوی گەڕەکەکە تەنیا یەک بگۆڕ (محاویلە)ی کارەبا هەیە و بەشیان ناکات، سەرەڕای خراپی ڕێگاکەیان.

لێدوانی فەرمی: بەدرەدین کە خەڵکی ئەو گەڕەکەیە، قسەی بۆ ئاڤا کردووە و دەڵێ: بێزار بووین بەدەست جۆزەهەڵدانەوە، ئێستا وای لێهاتووە مناڵەکانمان بە پارە جۆزەی کارەبامان بۆ هەڵدەدەنەوە، خۆم دوو تەلەڤزیۆن و سەلاجەیەکم سووتاوە بەهۆی کەمی ڤۆڵتیەی کارەباوە.

لەلایەکی دیکەوە: بەختیار قاسم، بەڕێوبەری گشتیی کارەبای هەولێر بە ئاڤای ڕاگەیاند، ئەم هەفتەیە محاویلە (بگۆڕ)ـێکی دیکەیان بۆ دادەنێین.