لە چەند گوندێکی هەولێر لە دوو مانگدا ژمارەیەک سەر مەڕ دەدزرێت

ئاڤا نیوز

لە چەند گوندێکی هەولێر لە ماوەی دوو مانگدا ژمارەیەک سەر مەڕ دەدزرێت. ئاژەڵدارێکیش دەڵێت، هەرچی دەکەین، ناتوانین ئەو دزانە ئاشکرا بکەین.

وێنە گەورەکە: لە گوندی باغەمرە و باغەمرەی شەهاب لە ناحیەی دارەتووی هەولێر، ئاژەڵداران گیریان خواردووە بەدەست دزەوە. لەماوەی دوو مانگدا 20 سەر مەڕی ئاژەڵدارانی ئەو دوو گوندە دزراون.

زانیاریی تایبەت: ئاژەڵدارێک بۆ ئاڤا قسەی کرد و دەڵێت، "هەرچی دەکەین ناتوانین ئەو دزانە ئاشکرا بکەین، لەبەرئەوەی دزەکان زۆر شارەزان. دەشڵێت، کامە مەڕی قەڵەو و باشە، ئەویان دەدزرێ.

ئەو ئاژەڵدارە ئاماژە بەوەش دەکات، دزەکە بۆ ئەوەی ئاشکرا نەبێت، ماوەی 15 ڕۆژ جارێک خۆی دەکات بەناو گوندەکاندا چەند سەر مەڕێک دەدزێت و بێ دەنگ دەبێت.

ئاژەڵدارەکە دەڵێت، "هەموو ڕۆژێک ئاژەڵەکان دانە دانە دەژمێرین"، چوونکە دزەکە جوان دەرگای گەوڕەکان دادەخاتەوە هەست ناکەی دزیت لێکراوە، "ناچارین بەیانی کە دەچینە ناو ئاژەڵەکان یەکسەر سەیری قەڵەو و باشەکانیان دەکەین، بۆئەوەی بزانین ماون یان دزراون".

ئەوەی لەوبارەیەوە دەگوترێت: خەڵکی گوندەکە ئێستا کامێرای چاودێرییان لەگەوڕەکان داناوە، یەکێکیشیان دەڵێ، "ناچارم شەوان لەناو عەرەبانەی تراکتۆردا لەدەرەوە بخەوم  و پاسەوانی مەڕەکانم بکەم".