کێشە و کەموکوڕییەکانی بیرەکانی ئاو لە هەولێر چارەسەر دەکرێن

ئاڤا نیوز

 

سەرەتای مانگی حەوت ئاوی پرۆژەی فریاگوزاریی خێرا دەگاتە بەشێکی گەڕەکەکانی شاری هەولێر، هەروەها کێشە و کەموکوڕییەکانی بیرەکانی ئاو لە شارەکە چارەسەر دەکرێن.

 

چیرۆکی سەرەکی: ئەمشەو لە پارێزگای هەولێر کۆبوونەوەیەک لە نێوان پارێزگاری هەولێر و قایمقامی ناوەندی و فەرمانگەکانی پەیوەست بە ئاو بەڕێوەچوو، تێیدا گفتوگۆ لەبارەی نۆژەنکردنەوە و چاککردنەوەى کەموکوڕییە تەکنیکییەکانى بیرەکان، چاره‌سه‌ركردن و دابینکردنى کارەباى 24 کاتژمێرى بۆ بیرەکانى هەموو ئەو شوێن و گه‌ڕه‌كانەى کارەبایان نەبووەتە 24 کاتژمێر و گرفتى کەمئاوى کرا، هەروەها بڕێک پارە بۆ چارەسەرکردنیان دابین کرا.

 

لێدوانی فەرمی: ئومێد خۆشناو، پارێزگارى هەولێر لە کۆبوونەوەیەک بۆ بەدواداچوون لە بارەی کارەکانى پڕۆژەکانى فریاگوزاریى خێرا، بەستنەوەی هێڵە ناوخۆییەکان، چارەسەرى کێشە و گرفتەکانى ئاو ڕایگەیاند: لەسەر ڕەزامەندى سەرۆکوەزیران مەسرور بارزانی، بڕی دوو ملیار و 500 ملیۆن دینار وەک فریاگوزاریى بۆ چارەسەرکردنى کەموکوڕى و گرفتەکانی بیرەکانی ئاو تەرخانکراوە، بۆ ئەو مەبەستەش جەخت له‌سه‌ر خێراترکردنى هەنگاوەکانى ئەو پرسە دەکەینەوە و لایەنە پەیوەندیدارەکان ڕادەسپێرین، بە هەماهەنگى و هاوکارى یەکتر ڕێکارەکانی  بگیرێتەبەر.

 

ئەوەی پێویستە بیزانیت: سەرەتای مانگی حەوت بەشێک لەو گەڕەکانەی کەوتوونەتە نێوان شەقامی ڕەشکین و تاوەکو شەقامی کۆیە، کە پێشتر بەهۆی دابەزینی ئاستی ئاوی ژێر زەوی دووچاری کەمئاوی هاتبوون، ئەم هاوینە ئاوی ئەو پڕۆژە ستراتیژیە دەگاتە گەڕەکەکانیان و کێشەی کەمئاویان نامێنێت.