کۆمپانیا چینییەکان کۆمەڵگەیەکی پیشەسازیی تایبەت بە وزەی خۆر لە هەولێر دروست دەکەن

ئاڤا نیوز

 

شاندی ژمارەیەک کۆمپانیای چینی کە لە بواری وزەی خۆر کاردەکەن لە هەولێرن و سەردانی وەزارەتی بازرگانی حکومەتی هەرێمی کوردستانیان کردووە، پێشنیازی دروستکردنی کۆمەڵگایەکی پیشەسازی تایبەت بە وزەی خۆریان کردووە.

 

وێنە گەورەکە: لەم چەند ساڵەی ڕابردوو دابینکردنی کارەبا لە ڕێگای وزەی خۆر لە هەرێمی کوردستان بایەخی زۆری پێ دەدرێت، چاوەڕێ دەکرێت دەستپێشخەرییەکەی بانکی ناوەندی بۆ پێدانی قەرز بەوانەی خوازیاری دانانی سیستمی وزەی خۆرن زیاد بکات.

 

لێدوانی فەرمی: ماردین ئەبوبەکر، بەڕێوەبەری ڕاگەیاندن و پەیوەندییەکانی وەزارەتی بازرگانی بە ئاڤا میدیای وت، کۆمپانیا چینییەکان لەگەڵ کەمال موسلیم، وەزیری بازرگانی کۆبوونەوە و وتیان بەنیازین هەرێمی کوردستان وەک سەنتەرێکی بازرگانی بەڕووی وڵاتانی ناوچەکە بەکاربخەین، جگە لەوە دەمانەوێت کۆمەڵگەیەکی پیشەسازی تایبەت بە ووزەی خۆر بهێنینە هەولێر. 

 

- بەوتەی ماردین ئەبوبەکر، وەزیری بازرگانی پێی وتوون، حکومەتی هەرێمی کوردستان و پلانی ستراتیژیەتی وەزارەت ئەوەیە کار ئاسانی بۆ کۆمپانیا بیانییەکان بکەن و پێشنیازی ئەو کۆمپانیا چینییانە بە بایەخەوە وەرگیراون و یاساکانی هەرێمی کوردستانیان بۆ ڕوونکراوەتەوە.

 

لەلایەکی دیکەوە: لەم هەفتەیە جموجۆڵێکی بەهێزی بازرگانی و ئابووری لە هەرێمی کوردستان دەستیپێکردووە، ئەمڕۆ شاندێکی ئەنجوومەنی هەناردەکارانی تورکیا لە هەولێرن کە ژمارەیان زیاتر لە 20 هاوردەکار و بازرگان و خاوەن کۆمپانیای تورکین و نوێنەرایەتی 150 هەزار کۆمپانیای تورکیا دەکەن. ژمارەیەک کۆبوونەوەی بازرگانی لەگەڵ کۆمپانیا و خاوەنکارانی هەولێر ئەنجام دەدەن.