سەدان هاونیشتمانیی کورد لە دەروازەیەکی کوردستان گیر دەخۆن

ئاڤا نیوز 

 

پێشنیوەڕۆی ئەمڕۆ لە دەروازەی تەمەرچینی دیوی ڕۆژهەڵاتی کوردستان بەهۆی دروستبوونی گرفتێکی تەکنیکی، سەدان هاونیشتمانی هەرێمی کوردستان  نەیانتوانیوە گەشت بکەن و گەڕێنراونەتەوە.

 

چیرۆکی سەرەکی: سەدان هاونیشتمانی هەرێمی کوردستان بەهۆکاری جیاواز ویستوویانە لەڕێگەی دەروازەی حاجی ئۆمەرانەوە گەشتی وڵاتی ئێران، بە دیاریکراوی شارەکانی ڕۆژهەڵاتی کوردستان بکەن، بەڵام کە دەگەنە دیوی ئێران ماوەی هەشت کاتژمێر لە دەروازەکە دەیانهێڵنەوە، دواتر ناهێڵن بچنە ئەو دیو و دەگەڕێنرێنەوە.

 

زانیاریی بەدەستهاتوو: هاونیشتمانییەک کە دانیشتووی شاری هەولێرە، ئەمڕۆ بەمەبەستی وەرگرتنی چارەسەری پزیشکی خۆی و خێزانەکەی لەڕێگەی حاجی ئۆمەرانەوە بڕۆنە ڕەزایە، لە دیوی کوردستان واتا حاجی ئۆمەران بەچەند خولەکێک هەموو ڕێکارەکانیان تەواوکردووە، بەڵام کە دەگەنە دیوی ئێران و دەروازەی تەمەرچین، نۆرەیان جیا دەکەنەوە و دوای هەشت کاتژمێر دەڵێن ئەمڕۆ بڕۆنەوە و بەیانی وەرنەوە.

 

لێدوانی فەرمی: ئاڤا قسەی لەگەڵ فەرمانگەی پەیوەندییەکانی دەرەوەی هەرێمی کوردستان کرد، گوتیان، "کاتژمێر 10:00 بەیانی کێشەیەکی تەکنیکی لە سیستەمی دەروازەی تەمەرچین دروستبووە و بەوهۆیەوە سیستەمەکە وەستاوە و هاونیشتمانیان نەیانتوانیوە گەشت بکەن، ئەو کێشەیە بەخێرایی چارەسەر دەکرێت و هاونیشتمانیان دەتوانن گەشتەکانیان بکەن."